ബാലുശേരി: നാട്ടുകാരുടെ ഏറെക്കാലത്തെ മുറവിളിക്ക് ഫലം കണ്ടു. ടൗണിലെ അഴുക്കുചാലുകള്‍ വൃത്തിയാക്കി തുടങ്ങി. ചാറ്റല്‍ മഴയില്‍പോലും ഓവുചാലിലെ മാലിന്യം അങ്ങാടിയിലൂടെ പരന്നൊഴുകുന്നത് വ്യാപാരികള്‍ക്കും കാല്‍നടക്കാര്‍ക്കും ഏറെ ദുരിതം വിതച്ചിരുന്നു. സംസ്ഥാന പാതയോരത്തെ അഴുക്കുചാലുകള്‍ പൊതുമരാമത്ത് വകുപ്പിന് കീഴിലായതിനാല്‍ മാലിന്യം നീക്കി നന്നാക്കേണ്ട ചുമതല പൊതുമരാമത്ത് വകുപ്പിനായിരുന്നു.
അഴുക്കുചാലും മാലിന്യവും ബാലുശേരിക്കാര്‍ക്ക് എക്കാലവും തലവേദനയായിരുന്നു. പരാതികളുടെ പ്രളയമുണ്ടായിട്ടും ബന്ധപ്പെട്ടവര്‍ തിരിഞ്ഞു നോക്കാത്ത അവസ്ഥയായിരുന്നു. പഞ്ചായത്തിന്റെ പ്രത്യേക ഇടപെടലും വ്യാപാരി വ്യവസായി സമിതി പ്രക്ഷോഭങ്ങളും സംഘടിപ്പിച്ചതോടെയാണ് പൊതുമരാമത്ത് വകുപ്പിന് വിവേകമുദിച്ചത്.