പുതുനഗരം: സ്‌കൂള്‍ പരിസരങ്ങളില്‍ പുകയില വില്‍പന പരിശോധനകള്‍ പ്രഹസനമാകുന്നതായി പരാതി. വിദ്യാലയങ്ങള്‍ക്കു സമീപ പ്രദേശത്ത് 200 മീറ്റര്‍ പരിധിയില്‍ പുകയില ഉല്‍പ്പന്നങ്ങള്‍ വില്‍പന നടത്തരുതെന്നും 18 വുയസിനു താഴെയുള്ളവര്‍ക്ക് പുകയില ഉല്‍പന്നങ്ങള്‍ വില്‍പന നടത്തരുതെന്ന് നിര്‍ദേശങ്ങള്‍ ഉണ്ടായിട്ടും പുതുനഗരം, കൊടുവായൂര്‍, പെരുവെമ്പ്, പട്ടഞ്ചേരി, പെരുമാട്ടി പഞ്ചായത്തുകളില്‍ വിദ്യാലയങ്ങളുടെ സമീപപ്രദേശങ്ങളില്‍ പുകയില ഉള്‍പ്പന്നങ്ങളുടെ വില്‍പന സജീവമായി നിലനില്‍ക്കുകയാണ്. ബീഡി മുതല്‍ പാന്‍മസാലകള്‍വരെ രഹസ്യമായ അറകളില്‍ സൂക്ഷിച്ചാണ് വിദ്യാലയങ്ങള്‍ക്കു സമീപങ്ങളില്‍ വില്‍പന. വിദ്യാര്‍ഥികളെ ലാക്കാക്കിയുള്ള പുകയില വില്‍പനക്കെതിരെ കഴിഞ്ഞവര്‍ഷം പുതുനഗരത്തും കൊടുവായൂരിലുമായി പി.ടി.എ കമ്മിറ്റി ശക്തമായ നിലപാടുകള്‍ സ്വീകരിക്കുകയും ഇതിന്റെ പരാതികള്‍ ബന്ധപെട്ട് ആരോഗ്യവകുപ്പിനും പൊലിസിനും കൈമാറിയെങ്കിലും ഒരനക്കവും ഉണ്ടായിട്ടില്ല. വണ്ടിത്താവളത്തും പട്ടഞ്ചേരിയിലുമുള്ള വിദ്യാലയത്തിനു മുന്നിലാണ് പുകയില ഉല്‍പ്പന്നങ്ങള്‍ വില്‍പന നടക്കുന്നത്. പൊലിസ് ഇടപെടല്‍ കാര്യക്ഷമമാകാത്തതാണ് പ്രതിസന്ധികള്‍ക്കു കാരണം. ചില സ്ഥാപനങ്ങളില്‍ പതിനെട്ടു വയസിനു മുകളില്‍ ഉള്ളവര്‍ക്ക് പുകയില ഉള്‍ല്‍പ്പന്നങ്ങള്‍ വില്‍പന നടത്തരുതെന്ന് ബോര്‍ഡ് സ്ഥാപിച്ചതല്ലാതെ മറ്റു നടപടികളൊന്നും ഉണ്ടായിട്ടില്ല. ആരോഗ്യവകുപ്പും പൊലിസും സംയുക്തമായി വിദ്യാലയങ്ങള്‍ക്കു സമീപങ്ങളില്‍ പരിശോധന കര്‍ശ്ശനമാക്കി. പുകയില പാന്‍മസാല ഉള്‍പ്പന്നങ്ങളുടെ വില്‍പന ഇല്ലാതാക്കണമെന്നാണ് നാട്ടുകാരുടെയും രക്ഷിതാക്കളുടെയും ആവശ്യം.