ന്യൂഡല്‍ഹി: മുസ്‌ലിം ലീഗിനെതിരെ തങ്ങള്‍ പറഞ്ഞതെന്ന പേരില്‍ പ്രചരിക്കുന്ന ആരോപണങ്ങള്‍ അടിസ്ഥാനരഹിതമാണെന്ന് രോഹിത് വെമുലയുടെ കുടുംബം. . മുസ്‌ലിം ലീഗിനെതിരെ തന്റെ കുടുംബം ഒരു ആരോപണവും ഉന്നയിച്ചിട്ടില്ലെന്ന് രോഹിതിന്റെ സഹോദരന്‍ രാജാ വെമുല അറിയിച്ചു. തന്റെ ഫേസ് ബുക്ക് അക്കൌണ്ട് ഹാക്ക് ചെയ്യപ്പെട്ടതാണെന്നും രാവിലെ മുതല്‍ തന്റെ എഫ്ബി പേജില്‍ എന്തൊക്കെ സംഭവിച്ചിട്ടുണ്ടോ അതൊന്നും തന്റെ അറിവോടെയല്ലെന്ന് രാജാ വെമുല വ്യക്തമാക്കി. ഇക്കാര്യം വിശദമാക്കുന്ന രാജാ വെമുലയുടെ കത്ത് മാതാവ് രാധികാ വെമുല ഫേസ് ബുക്കില്‍ പോസ്റ്റ് ചെയ്തിട്ടുണ്ട്.
രാവിലെ മുതല്‍ തന്റെ എഫ്ബി പേജില്‍ എന്തൊക്കെ സംഭവിച്ചിട്ടുണ്ടോ അതൊന്നും തന്റെ അറിവോടെയല്ലെന്ന് രാജാ വെമുല കത്തില്‍ പറയുന്നു.  രാവിലെ മുതല്‍ സിഗ്‌നല്‍ പോലും കിട്ടാത്ത ഒരു ഗ്രാമത്തിലായിരുന്നു. ഇന്നുവരെ എഫ്.ബി സുഹൃത്തുക്കളുടെ പട്ടികയില്‍ ഇല്ലാത്ത ഒരാളുമായും താന്‍ ചാറ്റ് ചെയ്തിട്ടില്ലെന്നും രാജാ വെമുല വ്യക്തമാക്കി.  സുഹൃത്ത് ഈ പോസ്റ്റ് അയച്ചു തരുവോളം ഇക്കാര്യം താന്‍ അറിഞ്ഞിരുന്നു പോലുമില്ലെന്നും രാജ പറയുന്നു.

'ആരോ തന്റെ ഫേസ് ബുക്ക് അക്കൌണ്ട് ഹാക്ക് ചെയ്തു. മോദിക്കെതിരെ സംസാരിക്കാന്‍ കേരളത്തിലെ ഐ.യു.എം.എല്‍ പാര്‍ട്ടിയില്‍ നിന്നും രാധിക വെമുല പണം വാങ്ങിയെന്ന് അവരെ അപകീര്‍ത്തിപ്പെടുത്താനായി പ്രചരിപ്പിച്ചതാണ്. അസത്യമാണത്. ഞങ്ങള്‍ പാവപ്പെട്ടവരായതുകൊണ്ട് ഐ.യു.എം.എല്‍ വീട് നിര്‍മ്മിക്കാന്‍ സഹായിക്കാമെന്ന് ഉറപ്പുനല്‍കിയിരുന്നു. അവര്‍ ആ വാക്കില്‍ ഉറച്ചുനില്‍ക്കുകയാണ്', രാജാ വെമുല വിശദീകരിച്ചു. സംഘി ഐ.ടി സെല്‍ തെമ്മാടികളേ നിങ്ങളുടെ ഗൂഢാലോചന അവസാനിപ്പിക്കൂ എന്നു പറഞ്ഞാണ് രാജാ വെമുല കത്ത് അവസാനിപ്പിക്കുന്നത്.