ചീമേനി: ചീമേനി രക്തസാക്ഷി സ്മാരക ക്ലബ്  സംസ്ഥാന-ജില്ലാ വോളിബോള്‍ അസോസിയേഷനുമായി സഹകരിച്ചു നടത്തുന്ന സംസ്ഥാന ഇന്റര്‍ക്ലബ് വോളിബോള്‍ മത്സരത്തിനു ചീമേനിയില്‍ ഇന്നു തുടക്കമാകും.
ഇന്ത്യന്‍നേവി, കെ.എസ്.ഇ.ബി, കേരള പൊലിസ്, കൊച്ചിന്‍ കസ്റ്റംസ്, കേരള പോസ്റ്റല്‍, ബി.പി.സി.എല്‍ എറണാകുളം, സായി തലശ്ശേരി, എം.ഇ.ജി തിരുവനന്തപുരം, അസംപ്ഷന്‍ ചങ്ങനാശേരി , സെന്റ് ജോസഫ് ഇരിങ്ങാലക്കുട തുടങ്ങി പന്ത്രണ്ടോളം പുരുഷ വനിതാ ടീമുകള്‍ മത്സരത്തില്‍  പങ്കെടുക്കും.
ഉല്‍ഘാടന ദിവസമായ ഇന്ന് ഇന്ത്യന്‍ നേവി കേരള പോസ്റ്റലിനെയും കൊച്ചിന്‍ കസ്റ്റംസ് കേരള പൊലിസിനെയും നേരിടും. തുടര്‍ന്നുള്ള ദിവസങ്ങളില്‍ വനിതാ വിഭാഗത്തില്‍ ഒരു മത്സരവും പുരുഷ വിഭാഗത്തില്‍ രണ്ടു മത്സരവും നടക്കും. 14 വരെ ലീഗ് മത്സരവും  15നു സെമി ഫൈനലും നടക്കും. 16നാണു ഫൈനല്‍.
വോളിബോള്‍ ടൂര്‍ണമെന്റ് സ്‌പോര്‍ട്‌സ് കൗണ്‍സില്‍ പ്രസിഡന്റ്  ടി.പി ദാസന്‍ ഉദ്ഘാടനം ചെയ്യും. എം രാജഗോപാല്‍ എം.എല്‍.എ, കെ.പി വത്സലന്‍, കെ ശകുന്തള എന്നിവര്‍  പങ്കെടുക്കും.