കണ്ണൂര്‍: ആയുഷ് വകുപ്പും പട്ടിക ജാതി വികസന വകുപ്പും സംയുക്തമായി സംസ്ഥാനത്തെ പട്ടികജാതി കോളനികളില്‍ ആരോഗ്യ സംരക്ഷണത്തിനായുള്ള ഹരികിരണം പദ്ധതി ആരംഭിക്കുന്നു. ഹോമിയോ, ആയുര്‍വേദ ചകിത്സാ രീതികള്‍ സംയോജിപ്പിച്ചാണ് നാലു കോടിയിലധികം രൂപ ചെലവിട്ട് പദ്ധതി നടപ്പിലാക്കുന്നത്. ദേശീയ ആയുഷ് മിഷന്‍, ഭാരതീയ ചികിത്സാ വകുപ്പ്, ഹോമിയോപ്പതി വകുപ്പ് എന്നിവയുടെ സഹകരണവും പദ്ധതിക്കായുണ്ട്. കണ്ണൂര്‍ ജില്ലയിലെ പാവന്നൂര്‍ പട്ടികജാതി കോളനിയിലെ 80 കുടുബങ്ങള്‍ക്കാണ് ആദ്യം പദ്ധതി തുടങ്ങുന്നത്. തളിപ്പറമ്പ് പാവന്നൂര്‍ എ.എല്‍.പി സ്‌കൂളില്‍ നാളെ രാവിലെ എട്ടിനു നടക്കുന്ന ചടങ്ങില്‍ ആര്യോഗ്യ മന്ത്രി കെ.കെ.ശൈലജ പദ്ധതിയുടെ സംസ്ഥാനതല ഉദ്ഘാടനം നിര്‍വഹിക്കും.

തുടര്‍ന്ന് 14 ജില്ലകളിലെ രണ്ടു വീതം പട്ടികജാതി കോളനികളില്‍ സംയുക്തമായി മെഡിക്കല്‍ ക്യാംപ് സംഘടിപ്പിക്കാനാണ് ലക്ഷ്യമിടുന്നത്. ക്യാംപില്‍ കുട്ടികളിലും പ്രായ പൂര്‍ത്തിയായവരിലും കാണുന്ന വിളര്‍ച്ച, പുരുഷ-സ്ത്രീ വന്ധ്യത, ജീവിതശൈലീ രോഗങ്ങള്‍, ലഹരി ഉപയോഗം, വാര്‍ധക്യകാല രോഗങ്ങള്‍ എന്നിവ കണ്ടെത്തി ചികിത്സ നിശ്ചയിക്കും. സൗജന്യ പരിശോധനയോടൊപ്പം ബോധവത്കരണ ക്ലാസ്, യോഗ പരിശീലനം, ഔഷധ സസ്യ പ്രദര്‍ശനം എന്നിവയും നടത്തും. കഴിഞ്ഞ മാര്‍ച്ചില്‍ പദ്ധതിക്ക് രൂപ രേഖ തയാറാക്കിയെങ്കിലും തെരഞ്ഞെടുപ്പ് വിജ്ഞാപനം വന്നതോടെ മാറ്റിവച്ചു.