ബംഗളൂരു: കര്‍ണാടകയില്‍ ഒരു പൊലിസ് ഉദ്യോഗസ്ഥന്‍ കൂടി ആത്മഹത്യ ചെയ്തു. കൊടഗു ജില്ലാ ഡെപ്യൂട്ടി പൊലിസ് സൂപ്രണ്ട് എം.കെ ഗണപതി(51)യെയാണ് ലോഡ്ജ് മുറിയിലെ ഫാനില്‍ തൂങ്ങിമരിച്ച നിലയില്‍ കണ്ടെത്തിയത്.

ചിക്കമംഗളൂരു ഡെപ്യൂട്ടി പൊലിസ് സൂപ്രണ്ട് കല്ലപ്പ ഹാദിബാഗ് ഇയിടെ ആത്മഹത്യ ചെയ്തിരുന്നു. പൊലിസ് യൂനിഫോമിലാണ് ഗണപതി ആത്മഹത്യ ചെയ്തത്. കര്‍ണാടക മന്ത്രി കെ.ജെ ജോര്‍ജിനെതിരേ ആരോപണമുന്നയിച്ചാണ് പൊലിസ് ഉദ്യോഗസ്ഥന്‍ ആത്മഹത്യ ചെയ്തത്. ലോഡ്ജില്‍ നിന്ന് കണ്ടെടുത്ത ആത്മഹത്യാ കുറിപ്പില്‍ മന്ത്രി ജോര്‍ജിന്റെയും മകന്റെയും ഉയര്‍ന്ന പൊലിസ് ഉദ്യോഗസ്ഥന്റെയും അനാവശ്യ ഇടപെടലുകളെ കുറിച്ച് സൂചിപ്പിക്കുന്നുണ്ട്.

രാഷ്ട്രീയമായ സമര്‍ദ്ദമാണ് മരണത്തിന് പ്രേരണയായതെന്നും കുറിപ്പില്‍ രേഖപ്പെടുത്തിയിട്ടുണ്ട്. നേരത്തെ കന്നട വാര്‍ത്താ ചാനലിന് നല്‍കിയ അഭിമുഖത്തില്‍ മുതിര്‍ന്ന ഉദ്യോഗസ്ഥന്‍ അപമാനിച്ചതായും നിരവധി കേസുകളില്‍ തനിക്കുമേല്‍ സമ്മര്‍ദ്ദം ചെലുത്തുന്നതായും ഗണപതി ആരോപിച്ചിരുന്നു. എന്നാല്‍ പൊലിസ് ഉദ്യോഗസ്ഥന്റെ ആത്മഹത്യയുമായി ബന്ധപ്പെട്ട് ഏതന്വേഷണത്തിനും തയാറാണെന്ന് മന്ത്രി കെ.ജി ജോര്‍ജ് പ്രതികരിച്ചു.

മന്ത്രി രാജിവെക്കണമെന്ന് ബി.ജെ.പി ആവശ്യപ്പെട്ടിട്ടുണ്ട്. സംഭവത്തെക്കുറിച്ച് വിശദമായി അന്വേഷിക്കുമെന്ന് മുഖ്യമന്ത്രി സിദ്ദാരാമയ്യ പറഞ്ഞു.