സുല്‍ത്താന്‍ ബത്തേരി: നിര്‍മാണം പൂര്‍ത്തിയായിട്ടും അടഞ്ഞുകിടക്കുന്ന സുല്‍ത്താന്‍ ബത്തേരി താലൂക്ക് ആശുപത്രിയോട് അനുബന്ധിച്ചുള്ള ഡയാലിസിസ് സെന്ററിന് കെട്ടിട നമ്പര്‍ ലഭിക്കാത്തത് ആരോഗ്യ വകുപ്പ് അധികൃതരുടെ വീഴ്ച കാരണമാണെന്ന് നഗരസഭ. ഫെയര്‍ലാന്റിലെ പുതിയബ്ലോക്കിനോട് അനുനുബന്ധിച്ച് നിര്‍മിച്ച ഡയാലിസിസ് കെട്ടിടത്തിന് നമ്പര്‍ നല്‍കാത്തതുമായി ബന്ധപെട്ട് നഗരസഭക്കെതിരേ ആരോപണം ഉയര്‍ന്ന സാഹചര്യത്തിലാണ് വിശദീകരണവുമായി നഗരസഭ അതികൃതര്‍ രംഗത്തെത്തിയത്.
കെട്ടിട നമ്പര്‍ നല്‍കുന്നതിന്ന് ആവശ്യമായ കംപ്ലീഷന്‍ പ്ലാന്‍ ആരോഗ്യ വകുപ്പ് നഗരസഭക്ക് ഇതുവരെ നല്‍കിയിട്ടില്ല. കൂടാതെ കെട്ടിട നമ്പര്‍ ആവശ്യപ്പെട്ട് അപേക്ഷ നല്‍കിയിട്ടില്ലെന്നും നഗരസഭാ ചെയര്‍മാന്‍ ടി.എല്‍ സാബു പറഞ്ഞു.
എന്നാല്‍ അപേക്ഷ നല്‍കിയിട്ടും അനാവശ്യ സാങ്കേതിക കാരണങ്ങള്‍ പറഞ്ഞാണ് കെട്ടിട നമ്പര്‍ നിഷേധിക്കുന്നതെന്നാണ് ആരോഗ്യ വകുപ്പ് അധികൃതര്‍ പറയുന്നത്. ഇതു സംബന്ധിച്ച് സുപ്രഭാതം വാര്‍ത്ത നല്‍കിയിരുന്നു. തുടര്‍ന്ന് ഇന്നലെ നഗരസഭാ ചെയര്‍മാന്‍ ടി.എല്‍ സാബു, മുന്‍ ചെയര്‍മാന്‍ സി.കെ സഹദേവന്‍ എന്നിവര്‍ കെട്ടിടം സന്ദര്‍ശിച്ചു. കംപ്ലീഷന്‍ പ്ലാന്‍ സമര്‍പ്പിച്ചാല്‍ ഉടന്‍ കെട്ടിട നമ്പര്‍ നല്‍കാനുള്ള നടപടി സ്വീകരിക്കുമെന്നും നഗരസഭാ അധികൃതര്‍ അറിയിച്ചു.