#നിസാര്‍ കലയത്ത്

ജിദ്ദ: മുന്ന് വര്‍ഷം മുന്‍പാണ് യു.പി റായ്ബറേലി സ്വദേശി അമര്‍നാഥ് ഏജന്റ് നല്‍കിയ വിസയില്‍ ഖത്തറിലെത്തിയത്. വീട്ടുജോലിക്കായാണ് അമര്‍നാഥ് ഖത്തറിലെത്തിയത്. പക്ഷേ രണ്ടാഴ്ച കഴിഞ്ഞപ്പോഴേക്കും ഇയാളെ സ്‌പോണ്‍സര്‍ സഊദിയിലേക്ക് കൂട്ടിക്കൊണ്ടു പോവുകയായിരുന്നു. സഊദിയിലെ നാരിയയില്‍നിന്ന് 100 കിലോമീറ്ററോളം ഉള്ളില്‍ മരുഭൂമിയില്‍ നുറോളം ഒട്ടകങ്ങളുള്ള ഫാമിലാണ് യുവാവിനെ എത്തിച്ചത്. രണ്ടര വര്‍ഷത്തോളമാണ് അമര്‍നാഥ് ഒട്ടകങ്ങളോടൊപ്പം ജീവിച്ചത്. ഇതിനിടെ രക്ഷപ്പെടാനുള്ള ശ്രമങ്ങളെല്ലാം നിഷ്ഫലമായി. പലപ്പോഴായി ലഭിച്ച 2500 റിയാല്‍ മാത്രമാണ് ആകെ കിട്ടിയ പ്രതിഫലം. ഒടുവില്‍ ഗത്യന്തരമില്ലാതെ ഒരു ദിവസം രാത്രി അവിടെ നിന്ന് ഒളിച്ചോടിയ അമര്‍ നാഥിന് പക്ഷെ ലക്ഷ്യസ്ഥാനത്ത് എത്താന്‍ കഴിഞ്ഞില്ല. വഴിയില്‍ ഓര്‍മ നഷ്ടപ്പെട്ട് തളര്‍ന്നു വീണ അമര്‍നാഥിനെ അതുവഴി വന്ന സഊദി പൗരന്‍ തന്റെ വാഹനത്തില്‍ കയറ്റി 'മസറ'യില്‍ എത്തിച്ചു പരിചരിച്ചു. എട്ട് മാസം അവിടെ തുടര്‍ന്ന അമര്‍നാഥിന് ഭക്ഷണവും ശമ്പളവും നല്‍കി സഊദി പൗരന്‍ നീതി കാട്ടി. പിന്നീട് എംബസിയില്‍ അഭയം തേടിയ അമര്‍നാഥിനെ സഹായിക്കാന്‍ ദമ്മാമിലെ ജീവകാരുണ്യ പ്രവര്‍ത്തകന്‍ നാസ് വക്കത്തിനെ ചുമതലപ്പെടുത്തി. തുടര്‍ന്ന് നാസ് ഡീപോര്‍ട്ടേഷന്‍ സെന്റര്‍ അധികാരികളുടെ സഹായത്തോടെ അമര്‍നാഥിനെ നാട്ടിലേക്ക് അയച്ചു.