തിരൂര്‍: വെട്ടം പഞ്ചായത്ത് ' ശുചിത്വ പച്ചപ്പിലേക്ക്' ആശയവുമായി സമ്പൂര്‍ഇ ഖര-ജൈവ മാലിന്യമുക്ത പദ്ധതി നടപ്പാക്കുന്നു. 28,50,000 രൂപ ചെലവഴിച്ചുള്ള മാലിന്യമുക്ത പദ്ധതി പ്രവര്‍ത്തനങ്ങള്‍ ഇന്ന് തുടങ്ങും.
ജൂലൈ 16 വരെയുള്ള ദിവസങ്ങളിലായി വിവിധ പ്രവര്‍ത്തനങ്ങളിലൂടെ ജനങ്ങളെ ബോധവല്‍ക്കരിക്കുമെന്നും തുടര്‍പ്രവര്‍ത്തനങ്ങള്‍ നടത്തുമെന്നും പഞ്ചായത്ത് പ്രസിഡന്റ് പി.പി മെഹറുന്നീസ പറഞ്ഞു. വെട്ടം പരിയാപുരത്തെ മദ്‌റസാ ഹാളില്‍ ശുചിത്വ കണ്‍വെന്‍ഷനോടെയാണ് പദ്ധതി പ്രവര്‍ത്തനങ്ങള്‍ക്ക് തുടക്കമാകുക. തൊട്ടടുത്ത ദിവസം വെട്ടം തീക്കുംപടി ലിഖാഉല്‍ ഇസ്‌ലാം മദ്‌റസയില്‍ വ്യാപാരി പ്രതിനിധികളുടെയും യോഗം ചേരും. വാര്‍ഡ് തല കണ്‍വന്‍ഷന്‍, റോഡുകളുടെയും കുളങ്ങളുടെയും ശുചീകരണം എന്നിവ സംഘടിപ്പിക്കും.
ജൂണ്‍ 30നാണ് വ്യാപാര ഹര്‍ത്താല്‍. ജൂലൈ രണ്ടിന് ഘടക സ്ഥാപനങ്ങളില്‍ ശുചീകരണം, മാലിന്യ ശേഖരണം എന്നിവ നടത്തും. ജൂലൈ മൂന്നിന് സ്‌കൂളുകളിലാണ് മാലിന്യശേഖരണം. പഞ്ചായത്തിനെ പച്ചപ്പിലേക്ക് കൊണ്ടുവരുന്നതിനായി തൊഴിലുറപ്പ് തൊഴിലാളികള്‍ ഉല്‍പാദിപ്പിച്ച 25,000 ഫലവൃക്ഷതൈകള്‍ നട്ടുപിടിപ്പിക്കും.
തരിശായും കൃഷിയിറക്കാതെയും കിടക്കുന്ന പഞ്ചായത്ത് പരിധിയിലെ 120 ഏക്കറില്‍ നെല്‍കൃഷിയിറക്കാനും പദ്ധതിയുണ്ട്. പുഴയില്‍ മാലിന്യം തള്ളുന്നത് തടയാന്‍ സി.സി.ടി.വി കാമറകള്‍ സ്ഥാപിക്കും.