അരീക്കോട്: ശുചീകരണ പ്രവൃത്തികള്‍ക്ക് ഫണ്ട് നീക്കിവച്ചിട്ടും മാലിന്യക്കൂമ്പാരം നീക്കാന്‍ നടപടിയില്ല. അരീക്കോട് പഞ്ചായത്തിലെ ബസ് സ്റ്റാന്‍ഡിന് പരിസരത്തുള്ള കംഫര്‍ട്ട് സ്റ്റേഷന് പിന്നിലാണ് മാലിന്യം കുന്നുകൂടിയിരിക്കുന്നത്. മഴക്കാല രോഗങ്ങള്‍ പടര്‍ന്ന് പിടിക്കുന്നത് തടയുന്നതിനായി ആരോഗ്യ വകുപ്പും തദ്ദേശ സ്ഥാപന അധികൃതരും വിവിധ പദ്ധതികള്‍ നടപ്പാക്കുമ്പോഴും അരീക്കോട് പഞ്ചായത്ത് അധികൃതര്‍ പുറം തിരിഞ്ഞ് നില്‍ക്കുകയാണ്.
കഴിഞ്ഞ ദിവസം ജില്ലാ പഞ്ചായത്തിന്റെ അരീക്കോട് ഡിവിഷനില്‍ പ്രത്യേക യോഗം ചേര്‍ന്ന് ശുചീകരണ പ്രവൃത്തികള്‍ നടത്താന്‍ നിര്‍ദേശം നല്‍കിയിരുന്നു, എന്‍.ആര്‍.എച്ച്.എമ്മില്‍നിന്നും വാര്‍ഡ് സാനിറ്ററി കമ്മിറ്റിയില്‍ നിന്നും 20000 രൂപ ശുചീകരണ പ്രവൃത്തികള്‍ക്കായി മാറ്റിവച്ചിട്ടുമുണ്ട്. 15 ദിവസം മുന്‍പ് തന്നെ എല്ലാ വാര്‍ഡുകളിലേക്കും രോഗ പ്രതിരോധ പ്രവര്‍ത്തനങ്ങള്‍ക്കുള്ള ഫണ്ട് വിതരണം ചെയ്തതായി അരീക്കോട് പഞ്ചായത്ത് സെക്രട്ടറി രാജന്‍ കൊടിയത്തൂര്‍ പറഞ്ഞു.
ദിനേനെ നൂറുകണക്കിന് യാത്രക്കാരെത്തുന്ന ബസ് സ്റ്റാന്‍ഡ് പരിസരത്ത് തന്നെ മാലിന്യം നിറഞ്ഞത് ആശങ്ക പരത്തുന്നുണ്ട്. ആളുകള്‍ കൂട്ടമായി നില്‍ക്കുന്നിടത്ത് മാലിന്യം കുന്നുകൂടിയതും വെള്ളം കെട്ടിനില്‍ക്കുന്നതും കൊതുക് വളരാനും രോഗങ്ങള്‍ പടര്‍ന്ന് പിടിക്കാനും കാരണമാകും.
എന്നാല്‍ പഞ്ചായത്തിന്റെ വിവിധ ഭാഗങ്ങളില്‍ പ്രത്യേക ശുചീകരണ പ്രവര്‍ത്തനങ്ങള്‍ ഊര്‍ജിതപ്പെടുത്തിയിട്ടുണ്ടെന്നും കംഫര്‍ട്ട് സ്റ്റേഷന്‍ പരിസരത്ത് മാലിന്യം നിക്ഷേപിക്കുന്നവര്‍ക്കെതിരെ കര്‍ശന നടപടി സ്വീകരിക്കുമെന്നും പഞ്ചായത്ത് പ്രസിഡന്റ് അമ്പാഴത്തിങ്ങല്‍ മുനീറ പറഞ്ഞിരുന്നെങ്കിലും നടപടിയുണ്ടായിട്ടില്ല.