പൂക്കോട്ടുംപാടം: നിലമ്പൂര്‍ മണ്ഡലത്തിനനുവദിച്ച ഗവ. കോളജ് പൂക്കോട്ടുംപാടത്ത് പ്രവര്‍ത്തനം തുടങ്ങി. ഈ വര്‍ഷം ബി.കോം ഫിനാന്‍സ്, ബി.എ മലയാളം, ബിഎസ്.സി ജ്യോഗ്രഫി എന്നീ കോഴ്‌സുകളിലേക്കുള്ള അഡ്മിഷനാണ് ആരംഭിക്കുന്നത്. ബി.കോം കോഴ്‌സിന് നാല്‍പത് സീറ്റും ബി.എ, മലയാളം, ബി.എസ്.സി ജ്യോഗ്രഫി എന്നീ കോഴ്‌സുകള്‍ക്ക് 24 സീറ്റുകളുമാണ്.
19 മുതല്‍ 22 വരെയുള്ള തിയതികളില്‍ അഡ്മിഷന്‍ പൂര്‍ത്തീകരിക്കും. താല്‍ക്കാലികമായി പൂക്കോട്ടുംപാടത്തെ ഗ്രാമീണ ബാങ്കിന് സമീപത്തെ വാടക കെട്ടിടത്തിലാണ് കോളജ് ആരംഭിക്കുന്നത്. കെട്ടിടങ്ങള്‍ ഒരുക്കുന്നതിനും കോളജിന്റെ പ്രവര്‍ത്തനം സജ്ജമാക്കുന്നതിനും കോളജ് വികസനം സാക്ഷാല്‍ക്കരിക്കുന്നതിനുമായി അമരമ്പലം പഞ്ചായത്തിലെ വ്യാപാരി വ്യവസായി ഏകോപന സമിതിയും വിവിധ രാഷ്ട്രീയ, സാമൂഹിക, സന്നദ്ധ പ്രവര്‍ത്തകരും ഒറ്റക്കെട്ടായി പരിശ്രമിച്ചുവരികയാണ്.
കോളജില്‍ എട്ട് അധ്യാപക തസ്തിക അനുവദിച്ചിട്ടുണ്ട്. ആദ്യ ഘട്ടത്തില്‍ നാല് സ്ഥിരം അധ്യാപകര്‍ നിയമനം നേടി. നിലവില്‍ കൊമേഴ്‌സ്, അറബിക്, ഇംഗ്ലീഷ് മലയാളം അധ്യാപകര്‍ നിയമനം നേടിയവരില്‍ ഉള്‍പ്പെടും.
ബാക്കി അധ്യാപകര്‍ പി.എസ്.സി അഡ്‌വൈസ് ആരംഭിച്ചതിനാല്‍ ഉടന്‍ എത്തുമെന്ന് പ്രതീക്ഷിക്കുന്നതായി നിലമ്പൂര്‍ കോളജ് സ്‌പെഷല്‍ ഓഫിസര്‍ സലാഹുദ്ദീന്‍ പറഞ്ഞു. പുതുതായി അഡ്മിഷന്‍ നേടിയവരെ സ്വീകരിക്കാനായി അമരമ്പലത്തെ വിവിധ രാഷ്ട്രീയ, സാമൂഹിക, വ്യാപാര രംഗത്തെ പ്രമുഖര്‍ എത്തിയിരുന്നു. കോളജിന്റെ താല്‍ക്കാലിക ഓഫിസില്‍ നടന്ന ചടങ്ങില്‍ കോളജ് സ്‌പെഷല്‍ ഓഫിസര്‍ സി.ടി സലാഹുദ്ദീന്‍ വിദ്യാര്‍ഥികളില്‍ നിന്നും അപേക്ഷ ഏറ്റുവാങ്ങി