കാസര്‍കോട്: കാസര്‍കോട് മണ്ഡലത്തില്‍ നടന്ന ബി.ജെ.പി ഹര്‍ത്താലിനിടെയുണ്ടായ അക്രമസംഭവങ്ങളുമായി ബന്ധപ്പെട്ട് ടൗണ്‍ പൊലിസ് അഞ്ച് കേസുകള്‍ രജിസ്റ്റര്‍ ചെയ്തു. ഈ കേസുകളിലെല്ലാമായി 287 പ്രതികളാണുള്ളത്. ഹര്‍ത്താലിന് അനുഭാവം പ്രകടിപ്പിച്ച് കറന്തക്കാട്ട് പൊലിസിന്റെ അനുമതിയില്ലാതെ പ്രകടനം നടത്തുകയും റോഡ് ഗതാഗതം തടസപ്പെടുത്തുകയും ചെയ്തതിനു ബി.ജെ.പി ജില്ലാ പ്രസിഡന്റ് അഡ്വ. കെ ശ്രീകാന്ത്, രവീശ തന്ത്രി, സുധാമ്മ, സജിത് കുമാര്‍, സതീശന്‍ തുടങ്ങി 150 പേര്‍ക്കെതിരേ കാസര്‍കോട് കേസെടുത്തിട്ടുണ്ട്.
താളിപ്പടുപ്പില്‍ റോഡ് ഗതാഗതവും പൊലിസിന്റെ കൃത്യനിര്‍വഹണവും തടസപ്പെടുത്തിയതിനും ന്യായവിരോധമായി സംഘം ചേര്‍ന്നതിനും ബി.ജെ.പിആര്‍.എസ്.എസ് പ്രവര്‍ത്തകരായ പ്രശാന്ത്, ശിവന്‍, കിഷോര്‍, രമേശ്, കാര്‍ത്തിക്, സനോജ്, രാജു, സന്തോഷ്, ചന്ദ്രശേഖരന്‍, ഉദയന്‍, പ്രമീളറൈ തുടങ്ങി 50 പേര്‍ക്കെതിരേയും കേസെടുത്തിട്ടുണ്ട്.
ചൗക്കിയില്‍ റോഡ് ഗതാഗതവും പൊലിസിന്റെ കൃത്യനിര്‍വഹണവും തടസപ്പെടുത്തിയതിനു ധനഞ്ജയന്‍, ചന്തു തുടങ്ങി 50 പേര്‍ക്കെതിരേയും കുഡ്‌ലു ആര്‍.ഡി നഗറില്‍ പൊലിസിന്റെ കൃത്യനിര്‍വഹണം തടസപ്പെടുത്തിയതിന് 30 പേര്‍ക്കെതിരേയും കേസെടുത്തു.
കുഡ്‌ലു വിവേകാനന്ദനഗറില്‍ വാഹനഗതാഗതം തടസപ്പെടുത്തുകയും വിദ്യാനഗര്‍ സി.ഐ ബാബു പെരിങ്ങേത്ത് ഉള്‍പ്പെടെയുള്ള പൊലിസ് ഉദ്യോഗസ്ഥരെ കല്ലെറിഞ്ഞു പരുക്കേല്‍പ്പിക്കുകയും ചെയ്തതിന് ഏഴു പേര്‍ക്കെതിരേയും കേസുണ്ട്.