ആലപ്പുഴ : കലക്ടര്‍ എസ്. സുഹാസ് ഇന്നലെ നീര്‍ക്കുന്നം സര്‍ക്കാര്‍ എസ്.ഡി.വി യു.പി.എസില്‍ അപ്രതീക്ഷിത സന്ദര്‍ശനം നടത്തി. കുട്ടികളുടെ ഉച്ചഭക്ഷണ സമയത്തായിരുന്നു സന്ദര്‍ശനം.
സ്‌കൂളിന്റെ ഊട്ടുപുരയില്‍ എത്തി വിദ്യാര്‍ഥികള്‍ക്ക് നല്‍കുന്ന ഉച്ചഭക്ഷണത്തിന്റെ ഗുണനിലവാരം വിലയിരുത്തി. കൊച്ചു കുട്ടികളോടൊപ്പം അദ്ദേഹം ഉച്ച ഭക്ഷണം കഴിക്കുകയും ചെയ്തു.
ഏറ്റവും കൂടുതല്‍ വിദ്യാര്‍ഥികള്‍ പഠിക്കുന്ന യു.പി.എസ് എന്ന നിലയില്‍ പ്രവര്‍ത്തനവും ഉച്ചഭക്ഷണത്തിന്റെ ഗുണ നിലവാരവും വിലയിരുത്തലായിരുന്നു തന്റെ സന്ദര്‍ശന ലക്ഷ്യമെന്ന് കലക്ടര്‍ പറഞ്ഞു.
മോര്, വെള്ളരിക്ക കൂട്ടാന്‍, ഉരുളക്കിഴങ്ങ് മെഴുക്കുപുരട്ടി എന്നിവ ചേര്‍ന്നതായിരുന്നു ഉച്ചയൂണ്. ഭക്ഷണം തൃപ്തികരമെന്ന് വിലയിരുത്തിയ കലക്ടര്‍ സ്‌കൂളിലെ ലൈബ്രറി, കമ്പ്യൂട്ടര്‍ ലാബ് എന്നിവിടങ്ങളിലും സന്ദര്‍ശനം നടത്തി.
ഹെഡ്മാസ്റ്ററും പി.ടി.എയും ചേര്‍ന്ന് സ്‌കൂളിന്റെ സ്ഥലപരിമിതി സംബന്ധിച്ച പ്രശ്‌നം കലക്ടറുടെ ശ്രദ്ധയില്‍പ്പെടുത്തി. ജില്ലാ വിദ്യാഭ്യാസ ഉപഡയറക്ടര്‍ കെ.പി ലതികയും കലക്ടറെ അനുഗമിച്ചു. ഹെഡ്മാസ്റ്റര്‍ സ്‌കൂളിന്റെ പ്രവര്‍ത്തനം കലക്ടര്‍ക്ക് വിശദീകരിച്ചു.