പാലക്കാട്: സിനിമയിലുള്ള കലാകാരന്മാരെ അസോസിയേഷനുകളല്ല വളര്‍ത്തുന്നത് വ്യക്തികളുടെ കഴിവുകൊണ്ടാണ് വളരുന്നതെന്ന് നടനും സംവിധായകനുമായ ബാലചന്ദ്രമേനോന്‍ പറഞ്ഞു. ലിംക ബുക്ക് ഓഫ് റെക്കോര്‍ഡ്‌സില്‍ ഇടം നേടിയ ബാലചന്ദ്രമേനോനെ മേഴ്‌സി കോളജ്, സ്വരലയ പാലക്കാട് എന്നിവര്‍ ആദരിക്കുന്നതിന്റെ ഭാഗമായി പാലക്കാട് എത്തിയ അദ്ദേഹം മീറ്റ് ദി പ്രസില്‍ സംസാരിക്കുകയായിരുന്നു. സിനിമ ലോകത്ത് 40 വര്‍ഷം പിന്നിട്ടത് ഏറ്റവും ഭാഗ്യമായി കരുതുന്നു. സിനിമ മേഖലയില്‍ ആരോടും വിരോധമില്ലെന്നും വ്യക്തിപരമായ ബന്ധങ്ങളില്‍ വിശ്വസിക്കുന്ന വ്യക്തിയാണ് താനെന്നും അദ്ദേഹം പറഞ്ഞു.
ടെക്‌നോളജിയുടെ പുരോഗതി കാരണം പഴകാല സിനിമകളെ അപേക്ഷിച്ച് ഇന്നത്തെ സിനിമ ഒരുപാട് വളര്‍ന്നു. ഇപ്പോള്‍ ഇറങ്ങുന്ന ന്യൂജനറേഷന്‍ സിനിമകള്‍ ഒരോന്നും ഒന്നിനൊന്ന് മെച്ചപ്പെട്ടതാണെന്നും അത്തരം സിനിമകളെ അഭിനന്ദിക്കുന്നുവെന്നും അദ്ദേഹം പറഞ്ഞു. റിലീസ് ചെയ്യാന്‍ പോകുന്ന എന്നാലും ശരത് എന്ന സിനിമ മറ്റ് ചിത്രങ്ങളില്‍ നിന്നുള്ള വ്യത്യസ്തമായി സംവിധായകരായ ലാല്‍ജോസ്്, മേജര്‍ രവി, സിദ്ധാര്‍ത്ഥ് ശിവ, വിജി തമ്പി, ജോഷിമാത്യു, എ.കെ.സാജന്‍, ദിലീഷ് പോത്തന്‍, ജോയ് മാത്യു, ബാലചന്ദ്ര മേനോന്‍ തുടങ്ങിയവര്‍ പത്ത് കഥാപാത്രങ്ങളായി അഭിനയിക്കുന്നുണ്ടെന്ന് ബാലചന്ദ്രന്‍മേനോന്‍ പറഞ്ഞു. സംവിധായകന്‍ മേജര്‍ രവി, നടന്‍ചാര്‍ളി, സ്വരലയ സെക്രട്ടറി ടി.ആര്‍.അജയന്‍ എന്നിവരും പങ്കെടുത്തു.