പുതുനഗരം: സ്‌കൂള്‍ പരിസരങ്ങളിലെ ബാരിക്കേഡുകള്‍ റോഡില്‍ സ്ഥാപിക്കാത്തത് അപകടങ്ങള്‍ക്ക് കാരണമാകുന്നു. പുതുനഗരം- കൊല്ലങ്കോട് പ്രധാന റോഡില്‍ മുസ്‌ലീം ഹൈസ്‌കൂളിനു സമീപം അപകടങ്ങള്‍ ഇല്ലാതിരിക്കുവാനായി പൊലിസ് സ്ഥാപിച്ച ബാരിക്കേഡുകള്‍ സ്‌കൂള്‍ സമയങ്ങളില്‍ റോഡിലേക്ക് എടുത്ത് വെക്കുകയും സ്‌കൂള്‍ പ്രവൃത്തിസമയം കഴിഞ്ഞാല്‍ എടുത്തുമാറ്റി റോഡരുകില്‍ സ്ഥാപിക്കുന്നത് പതിവാണെങ്കിലും കഴിഞ്ഞദിവസം ബാരിക്കേഡ് വെക്കാത്തതിനാല്‍ രണ്ടുബൈക്കുകള്‍ അമിതവേഗതയില്‍ എത്തിയതുമൂലം അപകടം സംഭവിക്കുകയും ബൈക്ക് യാത്രക്കാര്‍ക്ക് പരുക്കേല്‍ക്കുകയും ചെയ്തിരുന്നു. ഇതിനുശേഷമാണ് ബാരിക്കേഡ് സ്ഥാപിക്കുന്നത് സ്ഥിരമല്ലാതായി മാറിയത്. പൊലിസാണ് ബാരിക്കേഡ് സ്ഥാപിക്കുവാന്‍ എത്തേണ്ടതെങ്കിലും സ്‌കൂള്‍ ജീവനക്കാരാണ് മിക്ക സമയങ്ങളിലും ബാരിക്കേഡ് റോഡില്‍ സ്ഥാപിക്കുന്നത്. ബാരിക്കേഡ് ഇല്ലാത്ത സമയങ്ങളില്‍ വിദ്യാലയത്തിനു മുന്നില്‍ അപകടങ്ങള്‍ വര്‍ധിക്കുന്നതിനാല്‍ പുതുനഗരം പൊലിസ് ബാരിക്കേഡ് കൃത്യമായി സ്ഥാപിക്കുവാന്‍ തയാറാവണമെന്നാണ് നാട്ടുകാരുടെ ആവശ്യം.