കുട്ടനാട്:  നെല്ലിന്റെ ഗുണനിലവാരം മോശമാണെന്ന കാരണം പറഞ്ഞ്  20 കി.ഗ്രാം വരെ കിഴിവ് ആവശ്യപ്പെടുന്നത് കര്‍ഷകരില്‍ നിന്നും ഈടാക്കാതെ കൃഷിവകുപ്പ് നേരിട്ട് മില്ലുടമകള്‍ക്ക് കിഴിവ് നല്‍കണമെന്ന് കുട്ടനാട് വികസന സമിതി എക്‌സിക്യുട്ടീവ് ഡയറക്ടര്‍ ഫാ. തോമസ് പീലിയാനിയ്ക്കല്‍ ആവശ്യപ്പെട്ടു.
കൊയ്ത്ത് കഴിഞ്ഞ് 20 ദിവസം പൂര്‍ത്തികരിച്ചിട്ടും നെല്ല് സംഭരണം മുടങ്ങിയതില്‍ പ്രതിഷേധിച്ച് നെല്‍കര്‍ഷകര്‍ കുട്ടനാട് വികസന സമിതിയുടെ നേതൃത്വത്തില്‍ മങ്കൊമ്പ് പാഡി ഓഫീസിന് മുമ്പില്‍ നെല്ലിന്‍ ചാക്ക് നിരത്തിവെച്ച് നടത്തിയ കര്‍ഷക ധര്‍ണ്ണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
കര്‍ഷകരും സപ്ലൈകോയും തമ്മിലുള്ള നിലവിലുളള നെല്ലുസംഭരണ പോളിസി മില്ലുടമകള്‍ അട്ടിമറിക്കുകയാണെന്നും കര്‍ഷകര്‍ കിഴിവ് നല്‍കുന്നതിലൂടെ വന്‍ കടബാധ്യതകളിലേയ്ക്ക് പോകുകയാണെന്നുംഅദ്ദേഹം പറഞ്ഞു. മില്ലുകാരെ നിയന്ത്രിക്കാനും കര്‍ഷകരുടെ പരാതികള്‍ക്ക് പരിഹാരം ഉണ്ടാക്കാനും സംഭരണം കാര്യക്ഷമവും സുഗമവുമാക്കാനും ഉത്തരവാദിത്വപ്പെട്ട പാഡി ഓഫിസറെ ഉടന്‍ കുട്ടനാട്ടില്‍ നിയമിക്കണമെന്നും കര്‍ഷകരുടെ നെല്ലുവില ഉടന്‍ നല്‍കണമെന്നും കര്‍ഷകരുടെ കടബാധ്യതകള്‍ കേന്ദ്രസര്‍ക്കാര്‍ ഏറ്റെടുക്കണമെന്നും അദ്ദേഹം ആവശ്യപ്പെട്ടു.
ജോസി കുര്യന്‍ പുതുമന അധ്യക്ഷനായി. കാത്തലിക് ഫെഡറേഷന്‍ ഓഫ് ഇന്ത്യദേശീയ പ്രസിഡന്റ് അഡ്വ പി.പി.ജോസഫ്  മുഖ്യപ്രഭാഷണം നടത്തി, കത്തോലിക്കാ കോണ്‍ഗ്രസ് ചങ്ങനാശ്ശേരി അതിരൂപതാ പ്രസിഡന്റ് ക്യാപ്റ്റന്‍ ജോര്‍ജ്ജ് ജോസഫ് വാതപ്പള്ളി, അഡ്വ. ജേക്കബ് എബ്രഹാം,  ജയിംസ ് കല്ലുപാത്ര,  സംസാരിച്ചു.
വിവിധ പാടശേഖരസമിതി ഭാരവാഹികള്‍, കര്‍ഷകര്‍ തുടങ്ങിയവര്‍സമരത്തില്‍ പങ്കെടുത്തു. നെല്ലുസംഭരണം മുടങ്ങിയതിനെത്തുടര്‍ന്ന് കുട്ടനാട്ടില്‍ കാര്‍ഷിക ഹര്‍ത്താലും നടന്നു.