സാന്‍ ഫ്രാന്‍സിസ്‌കോ: യു.എസിലെ രണ്ടാമത്തെ വലിയ തൊഴില്‍ ദാതാവായ ആമസോണിലെ 600ഓളം ജീവനക്കാര്‍ക്ക് കൊവിഡ് സ്ഥിരീകരിച്ചതായി റിപ്പോര്‍ട്ട്. രോഗം ബാധിച്ചവരില്‍ ആറുപേര്‍ മരിച്ചതായും സി.ബി.എസ് ന്യൂസ് റിപ്പോര്‍ട്ട് ചെയ്തു. ഇന്‍ഡ്യാനയിലെ ഒരു ആമസോണ്‍ വെയര്‍ഹൗസില്‍ ജോലി ചെയ്യുന്ന 59കാരിയായ ജന ജംപാണ് '60 മിനിറ്റ് 'ടി.വി ഷോയില്‍ ഇത് വെളിപ്പെടുത്തിയത്.
'എനിക്ക് ഇപ്പോള്‍ നിങ്ങളോട് പറയാന്‍ കഴിയും, ഈ സംഖ്യ ഇതിലും കൂടുതലാണ്. പക്ഷേ കുറഞ്ഞത് 600 കേസുകള്‍ റിപ്പോര്‍ട്ട് ചെയ്തിട്ടുണ്ട്'- ജംപ് പറഞ്ഞു. ആറ് ആമസോണ്‍ ജീവനക്കാര്‍ കൊവിഡ് മൂലം മരിച്ചതായും അവര്‍ പറഞ്ഞു. രോഗബാധ സ്ഥിരീകരിച്ച വ്യക്തിക്ക് ആമസോണ്‍ അയയ്ക്കുന്ന റോബോകോളുകള്‍ ശേഖരിച്ചാണ് താന്‍ ഇത്തരത്തിലൊരു നിഗമനത്തില്‍ എത്തിയതെന്ന് ജന പറയുന്നു. യു.എസിലുള്ള കൊവിഡ് ബാധിതരില്‍ നിന്നാണ് ഇത്രയും അധികം പേര്‍ക്ക് രോഗം പടര്‍ന്നതെന്നും അവര്‍ വിശദീകരിച്ചു. യു.എസിലുടനീളമുള്ള സ്ഥലങ്ങളില്‍ കൊവിഡ് പോസിറ്റീവ് ആകുന്ന ആമസോണ്‍ ജീവനക്കാരുടെ കണക്ക് ജംപ് നിരീക്ഷിക്കുന്നുണ്ടെന്നാണ് റിപ്പോര്‍ട്ടുകള്‍ പറയുന്നത്.
അതേസമയം, ജന നടത്തിയ വിവരശേഖരണം ശരിയായ നടപടിയല്ലെന്ന് ആമസോണ്‍ ഹെഡ് ഓഫ് ഓപ്പറേഷന്‍ ഡെവ് ക്ലാര്‍ക്ക് പറഞ്ഞു. എന്നാല്‍ മാരകമായ ശ്വാസകോശ സംബന്ധമായ അസുഖത്തെ തുടര്‍ന്ന് ആമസോണില്‍ നാല് മരണങ്ങള്‍ ഉണ്ടായിട്ടുണ്ടെന്ന് കമ്പനി പറയുന്നുണ്ട്.
കൊവിഡ് വ്യാപിക്കുന്നതിനിടെ 1,75,000 പേരെ കൂടി നിയമിച്ചതായി അടുത്തിടെ ആമസോണ്‍ പ്രഖ്യാപിച്ചിരുന്നു.