ചെന്നൈ: രാജ്യത്തെ കൊവിഡ് വ്യാപനത്തില്‍ ഡല്‍ഹിയെ പിന്തള്ളി മുന്നോട്ട് കുതിക്കുന്ന തമിഴ്‌നാട് ഏതു നിമിഷവും ഗുജറാത്തിനെ പിന്തള്ളി രണ്ടാം സ്ഥാനത്തെത്തിയേക്കുമെന്ന് കണക്കുകള്‍. തമിഴ്‌നാട്ടില്‍ ചൊവ്വാഴ്ച റിപ്പോര്‍ട്ട് ചെയ്തത് 716 കൊവിഡ് പോസിറ്റീവ് കേസുകളാണ്. എട്ടുപേരാണ് മരിച്ചത്.
ഇതോടെ സംസ്ഥാനത്ത് ആകെ കൊവിഡ് രോഗികളുടെ എണ്ണം 8,718 ആയി. ആകെ മരണം 61 ആയി.
നിലവില്‍ കൊവിഡ് വ്യാപനത്തില്‍ മഹാരാഷ്ട്രയ്ക്കു പിന്നിലായി രണ്ടാമതുള്ള ഗുജറാത്തില്‍ 8,904 പേര്‍ക്കാണ് രോഗം ബാധിച്ചിട്ടുള്ളത്. ഒരു ദിവസംകൊണ്ട് തമിഴ്‌നാട് ഗുജറാത്തിനെ മറികടന്നേക്കാമെന്നതാണ് സ്ഥിതി. ചൊവ്വാഴ്ച ചെന്നൈയില്‍ മാത്രം 510 പേര്‍ക്കാണ് രോഗം സ്ഥിരീകരിച്ചത്. ഇതോടെ ചെന്നൈയിലെ രോഗികളുടെ എണ്ണം 4,882 ആയി. നിലവില്‍ സംസ്ഥാനത്ത് 6,530 പേരാണ് ചികിത്സയില്‍ തുടരുന്നത്. തിങ്കളാഴ്ച ഗൂഡല്ലൂര്‍ ജില്ലയില്‍ ആദ്യത്തെ കൊവിഡ് മരണം റിപ്പോര്‍ട്ട് ചെയ്തിരുന്നു.
രോഗവ്യാപനത്തില്‍ ഏറെ മുന്നിലുള്ള മഹാരാഷ്ട്രയില്‍ ഇതിനകം 24,427 പേര്‍ക്ക് വൈറസ് ബാധിച്ചിട്ടുണ്ട്. മുംബൈയാണ് രാജ്യത്ത് രോഗവ്യാപനത്തില്‍ മുന്നിലുള്ള നഗരം. 14,947 പേര്‍ക്ക് ഇവിടെ വൈറസ് ബാധിച്ചു. ഡല്‍ഹി(7,639), അഹ്മദാബാദ്(6,353) എന്നിവയാണ് പിന്നിലുള്ളത്. അഹ്മദാബാദിനു തൊട്ടുപിന്നിലാണ് ചെന്നൈ.
മഹാരാഷ്ട്രയിലെ രോഗബാധിതരില്‍ 60 ശതമാനവും മുംബൈയിലാണ്. ഗുജറാത്തിലെ രോഗികളില്‍ 70 ശതമാനവും അഹ്മദാബാദിലും.
ചെന്നൈ തമിഴകത്തെ കൊവിഡ് ബാധിതരില്‍ 55 ശതമാനത്തെ ഉള്‍ക്കൊള്ളുന്നു. രണ്ടുദിവസമായി രാജ്യത്ത് കൊവിഡ് ബാധിച്ചവരില്‍ പകുതിയും മുംബൈ, ചെന്നൈ, പൂനെ, അഹ്മദാബാദ്, താനെ എന്നീ അഞ്ചു നഗരങ്ങളിലാണ്.