സൻആ: യമനിൽ വൈറസ് ബാധയേറ്റു രണ്ടു പേർ കൂടി മരണപ്പെട്ടതായും പുതുതായി അഞ്ചു പേർക്ക് വൈറസ് ബാധ സ്ഥിരീകരിച്ചതായും യമൻ സുപ്രീം നാഷണൽ കൊവിഡ്-19 എമർജൻസി കമ്മിറ്റി അറിയിച്ചു. ഇതോടെ രാജ്യത്തെ വൈറസ് ബാധിതരുടെ എണ്ണം എഴുപത് ആയും മരണം 12 ആയും ഉയർന്നു. തലസ്ഥാന നഗരിയായ സൻആയുടെ കിഴക്കുള്ള മാരിബ്, ഏദൻ, ലഹ്ജ് എന്നിവിടങ്ങിലാണ് പുതിയ വൈറസ് ബാധ സ്ഥിരീകരിച്ചത്. ഈയാഴ്ച്ചയാദ്യം യമനിലെ വിവിധ ഭാഗങ്ങളിൽ ഇറാൻ സഹായമുള്ള ഹൂതി മലീഷികൾ കയ്യടക്കിയതോടെ തങ്ങളുടെ കീഴിലെ ആരോഗ്യ പ്രവർത്തകരുടെ പ്രവർത്തനങ്ങൾ ലോകാരോഗ്യ സംഘടന ഇവിടെ മരവിപ്പിച്ചിരുന്നു. കൊറോണ വൈറസ് കേസുകളിൽ ഹൂതികളുടെ മേൽ കൂടുതൽ സമ്മർദ്ദം ചെലുത്താനാണ് ഈ നീക്കം. യുദ്ധവും കഷ്ടതയും ഏറെ സഹിക്കുന്ന യമനിൽ വൈറസ് വ്യാപനം കനത്ത ദുരന്തം വരുത്തിവെക്കുമെന്ന് മുന്നറിയിപ്പുണ്ട്.