കോഴിക്കോട്: കാലിക്കറ്റ് സര്‍വകലാശാല ഇന്റര്‍സോണ്‍ കലോത്സവം 28 മുതല്‍ മെയ് രണ്ടുവരെ കോഴിക്കോട് മലബാര്‍ ക്രിസ്ത്യന്‍ കോളജില്‍ നടക്കും.
ലക്ഷദ്വീപ് അടക്കം ആറ് സോണലുകളില്‍നിന്നായി നാലായിരത്തോളം വിദ്യാര്‍ഥികള്‍ കലോത്സവത്തില്‍ മാറ്റുരയ്ക്കും. കലോത്സവത്തിന്റെ നടത്തിപ്പിനായി സംഘാടകസമിതി രൂപീകരിച്ചു. ക്രിസ്ത്യന്‍ കോളജ് ഓഡിറ്റോറിയത്തില്‍ നടന്ന സംഘാടസമിതി രൂപീകരണയോഗം പ്രിന്‍സിപ്പല്‍ ഡോ. ഡി.പി ഗോഡ്‌വിന്‍ സാംമ്രാജ് ഉദ്ഘാടനം ചെയ്തു. യൂനിവേഴ്‌സിറ്റി യൂനിയന്‍ വൈസ് ചെയര്‍മാന്‍ എം. അജയ്‌ലാല്‍ അധ്യക്ഷനായി.
 യൂനിവേഴ്‌സിറ്റി യൂനിയന്‍ ചെയര്‍മാന്‍ വി.പി ശരത്പ്രസാദ് പ്രവര്‍ത്തന രൂപരേഖ അവതരിപ്പിച്ചു. ലിന്റോ ജോസഫ്, എ.കെ ബിജിത്ത് എന്നിവര്‍ സംസാരിച്ചു. എ.എന്‍ നീരജ് സ്വാഗതവും സച്ചിന്‍ദേവ് നന്ദിയും പറഞ്ഞു.  സംഘാടക സമിതി ഭാരവാഹികളായി മേയര്‍ തോട്ടത്തില്‍ രവീന്ദ്രന്‍(ചെയര്‍മാന്‍), ഡോ. ഡി.പി ഗോഡ്‌വിന്‍ സാംമ്രാജ്, മഹേഷ് പാലങ്ങാട്, എസ്.കെ സജീഷ്(വൈസ് ചെയര്‍മാന്‍മാര്‍) യൂനിയന്‍ ജനറല്‍ സെക്രട്ടറി എ.എന്‍ നീരജ്(ജനറല്‍ കണ്‍വീനര്‍), ലിന്റോ ജോസഫ്(കണ്‍വീനര്‍), എം. അജയ്‌ലാല്‍, ടി.പി ബിനീഷ്, പി. നിഖില്‍(ജോയിന്റ് കണ്‍വീനര്‍മാര്‍) എന്നിവരെ തിരഞ്ഞെടുത്തു.