ജിദ്ദ: സഊദിയില്‍ വനിതകള്‍ ഇന്നു മുതല്‍ വാഹനവുമായി നിരത്തിലിറങ്ങും. എന്നാല്‍ 40 വര്‍ഷമായി തെക്കുപടിഞ്ഞാറന്‍ പ്രവിശ്യയിലെ അല്‍ബാഹയിലുള്ള അംസ ഹാതെല്‍ ജന്മനാട്ടില്‍ വാഹനമോടിക്കാന്‍ തുടങ്ങിയത് നാല്‍പത് വര്‍ഷം മുന്‍പാണ്. അധികൃതാരാരും അറിഞ്ഞില്ലെന്നു മാത്രം. 

അനിവാര്യമായ സാഹചര്യമാണ് വാഹനമോടിക്കാന്‍ നിര്‍ബന്ധിതയാക്കിയതെന്ന് ഇവര്‍ പറയുന്നു, വിലക്കുകള്‍ ലംഘിക്കാന്‍ ആഗ്രഹമുണ്ടായിട്ടല്ല.
പിതാവ് നേരത്തെ മരിച്ചു. രോഗിയായ ഉമ്മയെ സ്ഥിരമായി ആശുപത്രിയില്‍ കൊണ്ടുപോകേണ്ടിയിരുന്നു അവര്‍ക്ക്. അതിനാണ് വാഹനം ഓടിക്കാന്‍ തുടങ്ങിയത്. ഗ്രാമത്തിലെ യാത്രാവഴികള്‍ ഏറെ ദുഷ്‌കരമായിരുന്നു. ഉമ്മയുമായി ട്രാഫിക് പൊലിസിന്റെ കണ്ണില്‍ പെടാതെ വണ്ടിയോടിക്കും.
ടാറിങ് ഇല്ലാത്ത വഴികളിലൂടെയായിരുന്നു യാത്രയധികവും. നാട്ടുകാരാരും എതിര്‍ത്തില്ല. ഭര്‍ത്താവിനോടും ആദ്യം സമ്മതം വാങ്ങി. എന്നാല്‍ പിന്നീട് ഉപേക്ഷിച്ച് ഭര്‍ത്താവ് റിയാദിലേക്ക് പോയി. ഇതോടെ എല്ലാ കാര്യങ്ങളിലും സ്വയം പര്യാപ്തയാവാന്‍ അവര്‍ നിര്‍ബന്ധിതയായി.
ഇപ്പോള്‍ 40 വര്‍ഷമായി കരുതലോടെ വാഹനമോടിക്കുന്നു. ഇതുവരെ ഒരു അപകടവും വരുത്തിയിട്ടില്ലെന്ന് അവര്‍ അഭിമാനത്തോടെ പറയുന്നു. അമ്മാവന്‍ കാറോടിക്കുന്നത് കണ്ടാണ് ഡ്രൈവിങ് പഠിച്ചത്. ആരും പരിശീലിപ്പിച്ചിട്ടില്ലെന്നും അംസ പറഞ്ഞു. അല്‍ബാഹ മേഖലയില്‍ ഡ്രൈവിങ് ലൈസന്‍സ് ലഭിച്ച ആദ്യവനിത കൂടിയാണ് അംസ ഹാതെല്‍.