കായംകുളം: കട്ടച്ചിറ വെള്ളാപ്പള്ളി നടേശന്‍ കോളജിലെ വിദ്യാര്‍ഥിയായ ആര്‍ഷ് രാജ് (19) ജീവനൊടുക്കാന്‍ ശ്രമിച്ചതിന് കാരണക്കാരായവരെ ഉടന്‍ അറസ്റ്റ് ചെയ്യണമെന്ന് ആവശ്യപ്പെട്ട് എ.ഐ.എസ്.എഫ്- എ.ഐ.വൈ.എഫ് എന്നിവരുടെ നേതൃത്വത്തില്‍ ഇന്ന് രാവിലെ 10ന് മാവേലിക്കര സി.ഐ.ഓഫിസിലേക്ക് മാര്‍ച്ചും ധര്‍ണയും നടത്തും.
സി.പി.ഐ ജില്ലാ സെക്രട്ടറി ടി.ജെ.ആഞ്ചലോസ് ധര്‍ണ ഉദ്ഘാടനം ചെയ്യും. വിദ്യാര്‍ത്ഥികളെ പീഡിപ്പിക്കുകയും അപമര്യാദയായി പെരുമാറുകയും ചെയ്യുന്നതായി മുന്‍പും നിരവധി ആരോപണങ്ങള്‍ കോളജിനുനേരെ ഉയര്‍ന്നിട്ടുണ്ട്.
തുടര്‍ച്ചയായി വിദ്യാര്‍ത്ഥി പീഡനം നടത്തുന്നവരെ അറസ്റ്റ് ചെയ്യണമെന്ന് ആവശ്യപ്പെട്ടാണ് മാര്‍ച്ച് നടത്തുന്നതെന്ന് എ.ഐ.എസ്.എഫ് ജില്ലാ സെക്രട്ടറി അനുശിവന്‍, ഐ.ഐ.എസ്.എഫ് ജില്ലാ സെക്രട്ടറി ജിസ്‌മോന്‍ എന്നിവര്‍ പത്രക്കുറിപ്പില്‍ അറിയിച്ചു.