വാടാനപ്പള്ളി: ദേശീയപാതയില്‍ നാട്ടിക പുത്തന്‍ തോട് തെക്ക് രണ്ട് ചരക്ക് ലോറിയും ഒരു മിനി ലോറിയും കൂട്ടി ഇടിച്ച് ഒരാള്‍ക്ക് പരുക്ക്. മിനി ലോറി ഡ്രൈവര്‍ പാലക്കാട് കോട്ടപ്പടി പള്ളിക്കുന്ന് വീട്ടില്‍ അജീഷ്‌കുമാറിനാണു (33)പരുക്കേറ്റത്. ഇയാളെ നാട്ടിക സേവ് ആന്‍ഡ് സെക്യൂര്‍ ആംബുലന്‍സ് പ്രവര്‍ത്തകര്‍ വെസ്റ്റ് ഫോര്‍ട്ട് ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ ആറേ കാലിനായിരുന്നു അപകടം.റോഡരികില്‍ നിര്‍ത്തിയിട്ട ലോറിയില്‍ ഇടിക്കാതിരിക്കാന്‍ എറണാകുളത്തു നിന്നും കോഴിക്കോട്ടേക്ക് പോയിരുന്ന മിനി ലോറി വലതു വശത്തേക്ക് വെട്ടിച്ചപ്പോള്‍ എതിരെ വന്ന ലോറിയുമായി കൂട്ടി ഇടിക്കുകയായിരുന്നു. പരുക്കേറ്റ മിനി ലോറി ഡ്രൈവറെ തൃശൂരില്‍ നിന്നെത്തിയ ഫയര്‍ ആന്‍ഡ് റെസ്‌ക്യു സര്‍വിസ് രണ്ട് മണിക്കൂറോളം പണിപ്പെട്ട് ലോറിയുടെ മുന്‍ ഭാഗം വെട്ടിപ്പൊളിച്ചാണു രക്ഷപ്പെടുത്തിയത്. ഇതേ തുടര്‍ന്ന് ദേശീയപാതയില്‍ രണ്ട് മണിക്കൂര്‍ ഗതാഗതം തടസപ്പെട്ടു.