പേരാമ്പ്ര: ഇന്നലെ നടന്ന എസ്.എസ്.എല്‍.സി പരീക്ഷയുടെ ഉത്തരപേപ്പറുകള്‍ റോഡരികില്‍ കണ്ടെത്തി. കോഴിക്കോട് പോരാമ്പ്രയിലെ കായണ്ണ ഹയര്‍സെക്കന്‍ഡറി സ്‌കൂളിലെ ഉത്തരപേപ്പറുകളാണ് കണ്ടെത്തിയത്. ഇന്നലെ വൈകിട്ട് 3.30ന് കഴിഞ്ഞ മലയാളം, സംസ്‌കൃതം, അറബിക് പരീക്ഷകളുടെ ഉത്തര പേപ്പറുകളുടെ കെട്ടാണ് സ്‌കൂളില്‍ നിന്നും ഒരു കിലോമീറ്റര്‍ അകലെ കുറ്റിവയലില്‍ നിന്നും ഒരു നാട്ടുകാരന് ലഭിച്ചത്.

ഓഫിസ് അസിസ്റ്റന്റ് ബൈക്കില്‍ കോഴിക്കോട്ടേക്ക് കൊണ്ടുപോയ ഉത്തര പേപ്പറുകളാണ് വഴിയാത്രക്കാരന് ലഭിച്ചതെന്നാണ് വിവരം. ഇയാള്‍ അറിയിച്ചതിനെ തുടര്‍ന്ന് സ്‌കൂള്‍ അധികൃതര്‍ സ്ഥലത്തെത്തി ഉത്തരപേപ്പറുകള്‍ തിരികെ ഓഫിസില്‍ എത്തിച്ചു. കോഴിക്കോട് ഉപ വിദ്യാഭ്യാസ ഡയറക്ടര്‍ ഇ.കെ സുരേഷ് കുമാര്‍ സ്‌കൂളിലെത്തി പരിശോധന നടത്തി. പേരാമ്പ്ര ബ്ലോക്ക് പഞ്ചായത്ത് പ്രസിഡന്റ് എ.സി സതി, പഞ്ചായത്ത് പ്രസിഡന്റ് എന്‍. പത്മജ എന്നിവരും സ്‌കൂളിലെത്തി. ഓഫിസ് അസിസ്റ്റന്റ് സിബിയെ സസ്‌പെന്‍ഡ് ചെയ്തു.