കുന്നംകുളം: വിവാഹ ദിനത്തില്‍ രക്തദാനം നല്‍കി ദമ്പതികള്‍ മാതൃകയായി. കുന്നംകുളം തെക്കേപുറം പനക്കപറമ്പില്‍ സുബ്രഹ്മണ്യന്റെ മകന്‍ വിഘ്‌നേഷ്വരന്റെയും, വട്ടംകുളം കുന്നംകാട്ടയില്‍ പരേതനായ ഗോപിദാസിന്റെ മകള്‍ ധന്യയുടേയും വിവാഹമാണ് രക്തദാനത്തിന്റെ സന്ദേശം നല്‍കി നടന്നത്. ബ്ലഡ് ഡോണേഴ്‌സ് കേരള എന്ന സംഘടനയുടെ ജില്ലാ പ്രസിഡന്റും, യു.എ.ഇ ചാപ്റ്റര്‍ പ്രസിഡന്റുമായ വിഘ്‌നേഷ്വരന്റെ വിവാഹം കുന്നംകുളം തെക്കേക്കര കല്യാണ മണ്ഡപത്തിലായിരുന്നു.
രാവിലെ വധുഗൃഹത്തില്‍ നടന്ന താലികെട്ട് ചടങ്ങുകള്‍ക്ക് ശേഷം ഉച്ചക്ക് രണ്ടോടെ മണ്ഡപത്തിലെത്തിയ വധൂവരന്‍മാര്‍ മുറ്റത്ത് നിര്‍ത്തിയിട്ടിരുന്ന സഞ്ചരിക്കുന്ന രക്തബാങ്കിന്റെ വാഹനത്തിലേക്കാണ് വലതുകാലെടുത്ത് വെച്ചത്. ഇവരോട് ഐക്യദാര്‍ഢ്യം പ്രകടിപ്പിച്ച് 20 ല്‍പരം സുഹൃത്തുക്കളും വിവാഹ ദിനത്തിന്റെ സന്തോഷകരമായ ഓര്‍മ്മക്കായ് രക്തദാനം നിര്‍വഹിച്ചു. രക്തദാന പരിപാടിക്ക് തുടക്കമിട്ടത് സബ്ബ് ഇന്‍സ്‌പെക്ടര്‍ ഫര്‍ഷാദായിരുന്നു.
സ്വന്തം രക്തം ദാനം ചെയ്ത് ഫര്‍ഷാദ് യുവാക്കളുടെ പുത്തന്‍ ജനകീയ ചിന്തക്ക് ഐക്യദാര്‍ഡ്യം ചെയ്തു. 2011ല്‍ രൂപീകൃതമായ ബ്ലഡ് ഡോണേഴ്‌സ് കേരള എന്ന സംഘടനക്ക് നിലവില്‍ 7000 ത്തില്‍ പരം അംഗങ്ങളുണ്ട്. പൂര്‍ണമായും സോഷ്യല്‍ മീഡിയകളിലൂടെ പ്രവര്‍ത്തിക്കുന്ന ഈ കൂട്ടായ്മ പ്രതിദിനം 30 യൂനിറ്റ് രക്തം ആവശ്യക്കാര്‍ക്ക് നല്‍കുന്നുണ്ട്. രക്തം ആവശ്യമുള്ളവര്‍ക്ക് ഏത് സമയത്തും ഇവരുടെ സേവനം ലഭ്യമായിരിക്കും. അതിനായി സതാ തയ്യാറായ സൗഹൃദങ്ങളാണ് ഈ കൂട്ടായ്മയുടെ ശക്തിയെന്നും ഇന്ത്യക്ക് പുറമെ അറബ് രാജ്യങ്ങളിലും ഈ കൂട്ടായ്മ സജീവമായി പ്രവര്‍ത്തിക്കുന്നുണ്ട്. ജീവിതത്തിലെ ഏറ്റവും സന്തോഷമേറിയ മുഹൂര്‍ത്തം ഒരിക്കലും മറക്കാനാകാത്തതായി മാറ്റുകയും മറ്റുള്ളവര്‍ക്ക് ഒരു സന്ദേശം നല്‍കുവാനുമായാണ് വിവാഹ ദിനത്തില്‍ രക്തം ദാനം ചെയ്യുക എന്ന തീരുമാനത്തിലെത്താന്‍ കാരണമായതെന്ന് ദമ്പതികള്‍ പറഞ്ഞു.