ശ്രീകണ്ഠപുരം: വില്‍പ്പനയ്ക്കായി എത്തിച്ച 672 വിദേശമദ്യവുമായി യുവാവ് അറസ്റ്റില്‍. ഇരിട്ടി ചപ്പുംകരിയില്‍ കല്ലുവെട്ടുകുഴിയില്‍ ജയേഷി(37)നെയാണ് ശ്രീകണ്ഠപുരം എക്‌സൈസ് ഇന്‍സ്‌പെക്ടര്‍ രഞ്ജിത്ത് ബാബുവും സംഘവും അറസ്റ്റു ചെയ്തത്. 375 മില്ലിയുടെ 240 കുപ്പികളും 180 മില്ലിയുടെ 432 ഫ്രൂട്ടി മോഡല്‍ പാക്കറ്റുകളുമാണ് പിടികൂടിയത്.
ഇരിട്ടി-ഉളിക്കല്‍ മലയോര മേഖലയില്‍ നാടന്‍ ചാരായവും കര്‍ണാടക-മാഹി മദ്യവും എത്തിച്ച് വില്‍പന നടത്തുന്ന കണ്ണികളിലെ പ്രധാനിയാണ് ജയേഷ്. രഹസ്യ വിവരത്തിന്റെ അടിസ്ഥാനത്തില്‍ നടത്തിയ പരിശോധനയിലാണ് മദ്യം പിടിച്ചെടുത്തത്. മദ്യം കടത്താന്‍ ഉപയോഗിച്ച ജീപ്പും പിടികൂടി. നേരത്തെ ചാരായ കേസില്‍ റിമാന്‍ഡ് കഴിഞ്ഞിറങ്ങിയ ഇയാള്‍ കര്‍ണാടക മദ്യം വിതരണം ചെയ്യുന്നതായി വിവരം ലഭിച്ചിരുന്നു. ഇതിനു മുമ്പും ഇയാളുടെ വീട്ടില്‍ നിന്ന് 5 ലിറ്റര്‍ ചാരായവും 300 ലിറ്റര്‍ വാഷും കണ്ടെടുത്തിരുന്നു. അനധികൃതമായി വിദേശ മദ്യം കടത്തിയ കുറ്റത്തിന് കണ്ണൂര്‍ എക്‌സൈസ് സര്‍ക്കിള്‍ ഓഫിസില്‍ ഇയാള്‍ക്കെതിരേ കേസെടുത്തിട്ടുണ്ട്. പ്രിവന്റീവ് ഓഫിസര്‍ പി.സി വാസുദേവന്‍, സിവില്‍ എക്‌സൈസ് ഓഫിസര്‍മാരയ എം.വി അഷ്‌റഫ്, ടി.വി ഉമേഷ്, ടി.വി പ്രകാശന്‍, പി.വി പ്രകാശന്‍ എന്നിവരും സംഘത്തിലുണ്ടായിരുന്നു.