കൊച്ചി: സംസ്ഥാനത്ത് മിക്ക എ.ടി.എമ്മുകളും കാലിയായതോടെ വിഷുവിന് കൈനീട്ടം നല്‍കാന്‍ ജനം നെട്ടോട്ടമോടി. ബുധനാഴ്ച വൈകുന്നേരം തുടങ്ങിയ നോട്ട് പ്രതിസന്ധി ഇന്നലെയും തുടര്‍ന്നതാണ് എ.ടി.എമ്മുകള്‍ കാലിയാകാന്‍ കാരണം. വിവിധ ബാങ്കുകളുടെ ബ്രാഞ്ചുകളോട് ചേര്‍ന്ന ചുരുക്കം ചില എ.ടി.എമ്മുകള്‍ മാത്രമാണ് ഇന്നലെ പ്രവര്‍ത്തിച്ചത്.
ഡിജിറ്റല്‍ പണമിടപാട് പ്രോത്സാഹിപ്പിക്കുന്നതിന്റെ ഭാഗമായി റിസര്‍വ് ബാങ്ക് പണം നല്‍കുന്നതില്‍ വരുത്തിയ കുറവാണ് ആഘോഷങ്ങള്‍ക്ക് മങ്ങലേല്‍ക്കാന്‍ കാരണം. റിസര്‍വ് ബാങ്ക് തിരുവനന്തപുരത്ത് എത്തിക്കുന്ന പണം വിവിധ കറന്‍സി ചെസ്റ്റുകള്‍ വഴിയാണ് ബാങ്ക് ശാഖകളില്‍ എത്തിയിരുന്നത്.എന്നാല്‍ കഴിഞ്ഞ ദിവസങ്ങളില്‍ ഇപ്രകാരമെത്തിയ പണത്തിന്റെ അളവ് കുറഞ്ഞത് അക്ഷരാര്‍ഥത്തില്‍ ജനത്തെ നെട്ടോട്ടമോടിച്ചു.
വിഷുവും പെസഹവ്യാഴവും ദു:ഖവെള്ളിയുമൊക്കെ പ്രമാണിച്ച് ഇന്നലെ മുതല്‍ സര്‍ക്കാര്‍-സ്വകാര്യ സ്ഥാപനങ്ങള്‍ക്ക് അവധി നല്‍കിയതിനാല്‍ ബുധനാഴ്ച മുതല്‍ തന്നെ ആഘോഷങ്ങള്‍ക്കുള്ള സാധനങ്ങള്‍ വാങ്ങാന്‍ എ.ടി.എമ്മുകളില്‍ നിന്നു പണം പിന്‍വലിച്ചതും പ്രതിസന്ധിക്ക് ആക്കംകൂട്ടി. മിക്ക എ.ടി.എമ്മുകളും ഷട്ടറിട്ട നിലയിലായിരുന്നു. എസ്.ബി.ടി-എസ്.ബി.ഐ ലയനത്തെ തുടര്‍ന്ന് ചില എ.ടി.എം കൗണ്ടറുകള്‍ അടച്ചുപൂട്ടിയതും ജനത്തെ വലച്ചു.
ചിലരാകട്ടെ പ്രതിസന്ധി മുന്നില്‍കണ്ട് അക്കൗണ്ടില്‍ വന്ന ശമ്പളം മുഴുവന്‍ പിന്‍വലിച്ചതും ബാങ്കില്‍ പണമില്ലാതാകാന്‍ ചെറിയതോതില്‍ കാരണമായി. എ.ടി.എം സര്‍വിസിന് ബാങ്ക് ചാര്‍ജ് ഈടാക്കിയതിനെ തുടര്‍ന്ന് പല തവണ പണം എടുക്കാതെ കൂടുതല്‍ തുക ഒരുമിച്ച് പിന്‍വലിച്ചതും പ്രതിസന്ധി രൂക്ഷമാക്കി. വിഷുകൈനീട്ടം നല്‍കാന്‍ എ.ടി.എമ്മുകളില്‍ നിന്നു പണം പിന്‍വലിക്കാനെത്തിയവരില്‍ പലര്‍ക്കും രണ്ടായിരത്തിന്റെ നോട്ടാണ് ലഭിച്ചത്. ചില്ലറ ലഭിക്കാതെ പലരും നെട്ടോട്ടമോടി.
ഈസ്റ്റര്‍ വരെയുള്ള ദിവസങ്ങളില്‍ പണപ്രതിസന്ധി തുടരുമെന്നാണ് വിലയിരുത്തല്‍. വിവിധ ബാങ്കുകളുടെ ബ്രാഞ്ചുകള്‍ക്ക് സമീപമുള്ള എ.ടി.എമ്മുകളില്‍ ബുധനാഴ്ച രാത്രി കുറച്ച് പണം നിറച്ചെങ്കിലും ഇന്നലെ രാവിലെ മുതല്‍ തന്നെ ഇവയും കാലിയായി.
ഔട്ട് സോഴ്‌സ് ചെയ്തിരിക്കുന്ന എ.ടി.എമ്മുകളില്‍ എത്തിയവര്‍ നിരാശയോടെ മടങ്ങി. മൂന്നും നാലും എ.ടി.എമ്മുകളില്‍ കയറിയിറങ്ങിയതിനു ശേഷമാണ് പലര്‍ക്കും പണം ലഭ്യമായത്.