തൊടുപുഴ: ഫിഷറീസ് വകുപ്പിന്റെയും ഭക്ഷ്യസുരക്ഷാ വകുപ്പിന്റെയും നേതൃത്വത്തില്‍ തൊടുപുഴയിലും കട്ടപ്പനയിലും പച്ചമീന്‍ വില്‍പന കേന്ദ്രങ്ങളില്‍ പരിശോധന നടത്തി. പുളിയന്‍മല റോഡിലെ സ്വകാര്യ സ്ഥാപനത്തില്‍ നടത്തിയ പരിശോധനയില്‍ ഏതാനും പച്ചമീനുകളില്‍ ചെറിയതോതില്‍ ഫോര്‍മലിന്‍ കണ്ടെത്തി. അവിടെനിന്ന് മീനുകളുടെ സാമ്പിള്‍ ശേഖരിച്ച് എറണാകുളത്തിനു പരിശോധനയ്ക്ക് അയച്ചു. നഗരത്തിലെ മാര്‍ക്കറ്റില്‍ നടത്തിയ പ്രാഥമിക പരിശോധനയില്‍ മീനില്‍ രാസവസ്തുക്കള്‍ കണ്ടെത്താനായില്ല.
ജില്ലാ ഫുഡ് സേഫ്റ്റി അസിസ്റ്റന്റ് കമ്മിഷണര്‍ ബി. മധുസൂദനന്‍, പീരുമേട് സര്‍ക്കിള്‍ ഫുഡ് സേഫ്റ്റി ഓഫീസര്‍ ജേക്കബ് തോമസ്, ഇടുക്കി സര്‍ക്കിള്‍ ഫുഡ് സേഫ്റ്റി ഓഫിസര്‍ എസ്. അനഘ, ഫിഷറീസ് വകുപ്പ് അസിസ്റ്റന്റ് ഡയറക്ടര്‍ പി. ശ്രീകുമാര്‍, സബ് ഇന്‍സ്‌പെക്ടര്‍ ഓഫ് ഫിഷറീസ് പി.എസ് ഷെനൂബ്, ഫീല്‍ഡ് ഓഫിസര്‍മാരായ പ്രദീഷ്, സ്വാദിഷ്, ഗിരീഷ് എന്നിവരുടെ നേതൃത്വത്തിലാണ് പരിശോധന നടത്തിയത്. വരുംദിവസങ്ങളിലും പരിശോധന തുടരുമെന്ന് അധികൃതര്‍ അറിയിച്ചു.