റിയാദ്: സഊദിയിൽ കൊവിഡ് വൈറസ് വ്യാപനവുമായി ബന്ധപ്പെട്ട് നേരത്തെ ഏർപ്പെടുത്തിയിരുന്ന നിയന്ത്രണങ്ങളിൽ ഇളവുകളുടെ രണ്ടാം ഘട്ടം നാളെ ആരംഭിക്കാനിരിക്കെ കടുത്ത വ്യവസ്ഥകൾ ഏർപ്പെടുത്തി സഊദി ആഭ്യന്തര മന്ത്രാലയം. നാളെ മുതൽ കർഫ്യു സമയത്തിലെ ഇളവ് രാവിലെ ആറു മണി മുതൽ രാത്രി എട്ടു മണി വരെയാക്കി ഉയർത്തിയതിനോടൊപ്പം സ്വകാര്യ സ്ഥാപനങ്ങളും മറ്റു മേഖലകളും തുറന്നു പ്രവർത്തിക്കുന്നതിനുള്ള അനുമതി കൂടി പ്രാബല്യത്തിൽ വരുന്നതിന്റെ മുന്നോടിയായാണ് കടുത്ത നിബന്ധനകളുമായി ആഭ്യന്തര മന്ത്രാലയം രംഗത്തെത്തിയത്. ഇത് പ്രകാരം ഫേസ് മാസ്‌ക് ധരിക്കാതെ പുറത്തിറങ്ങിയാൽ ആയിരം റിയാൽ പിഴ ഈടാക്കുമെന്നു ബന്ധപ്പെട്ടവർ അറിയിച്ചു. രണ്ടാം തവണയും മാസ്കില്ലാതെ പിടികൂടിയാല്‍ പിഴ ഇരട്ടിയാകം.

    ഷോപ്പിംഗ് സെന്ററുകള്‍ മാളുകള്‍ എന്നിവിടങ്ങളില്‍ പ്രവേശിക്കുമ്പോള്‍ ശരീരോഷ്മാവ് പരിശോധിക്കുന്നത് തടയുക, പരിശോധനയില്‍ കൂടിയ താപ നില രേഖപ്പെടുത്തിയാല്‍ തുടര്‍ പരിശോധനക്കുള്ള നിര്‍ദ്ദേശങ്ങള്‍ അവഗണിക്കുക എന്നിവയും ആയിരം റിയാല്‍ വരെ പിഴ ലഭിക്കാവുന്ന കുറ്റമായി പരിഗണിക്കും. വ്യക്തികൾക്കായിരിക്കും പിഴ ഈടാക്കുക. അതേസമയം, ഇസ്തിറാഹകളിലും വീടുകളിലും മസറകളിലും മറ്റും വിവാഹമടക്കമുള്ള പരിപാടികളില്‍ 50 പേര്‍ക്ക് വരെ ഒന്നിച്ചിരിക്കാമെന്നും മന്ത്രാലയം അറിയിച്ചു. എന്നാൽ, ആരോഗ്യ മന്ത്രാലയം നിർദേശിച്ച കാര്യങ്ങൾ പാലിക്കപ്പെടണം. മന്ത്രാലയ നിർദേശങ്ങൾ പാലിക്കപ്പെടുന്നില്ലെങ്കിൽ പതിനായിരം റിയാൽ വരെ പിഴ ഈടാക്കും. രാജ്യത്ത് നിയന്ത്രണങ്ങൾളിൽ അയവ് വരുത്തുമ്പോഴും കൊവിഡ് വ്യാപനം നിയന്ത്രിക്കുന്നതിന് സാമൂഹിക വ്യാപനം അടക്കമുള്ള കാര്യങ്ങള്‍ കര്‍ശനമായി പാലിക്കുന്നതിനാണ് ഈ മുന്‍കരുതല്‍ നടപടികള്‍.

     അതേസമയം, രാജ്യത്തെ കൊവിഡ് ബാധിതരിൽ എഴുപത് ശതമാനം പേരും രോഗ മുക്തി നേടിയതായും കൊവിഡ് വാക്‌സിൻ ലഭ്യമായാൽ അത് ആദ്യം കൈവശപെടുത്തുന്ന രാജ്യങ്ങളിൽ ഒന്നായിരിക്കും സഊദി അറേബ്യയെന്നും സഊദി ആരോഗ്യ മന്ത്രി ഡോ: തൗഫീഖ് അൽ റബീഅ പറഞ്ഞു. അൽ അറബിയെ ചാനലിന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. ജി 20 രാജ്യങ്ങളിലെ ഏറ്റവും കുറഞ്ഞ മരണ നിരക്കുള്ള രാജ്യങ്ങളിൽ ഒന്നാണ് സഊദി. വൈറസിനെ പ്രതിരോധിക്കനുള്ള ശേഷി സഊദിക്കുണ്ട് .പ്രതിസന്ധിയെ നാം സുരക്ഷിതമായി അതി ജീവിക്കും. അതിനാൽ എല്ലാവരും സഊദി ആരോഗ്യ മന്ത്രാലയത്തിന്റെ സുരക്ഷാ മുൻകരുതലുകൾ പൂർണ്ണമായും പാലിക്കണമെന്നും അദ്ദേഹം പറഞ്ഞു.