കത്തുന്ന വേനലില്‍ ശരീരവും മനസും ഒരു പോലെ ചുട്ടുപൊള്ളുമ്പോള്‍ എന്തൊരു അസഹനീയതയാണ്. വെറുതെ ഇരുന്നാല്‍ പോലും തളര്‍ന്നു പോകും. ശരീരത്തിലെ ജലാംശം ധാരാളമായി നഷ്ടപ്പെടുന്നതാണ് ഈ തളര്‍ച്ചക്ക് ഒരു കാരണം. ചൂടില്‍ ഉന്മേഷം പകരുന്ന കുറച്ചു പാനീയങ്ങളിതാ.

പൊതിന നാരങ്ങവെള്ളം
ചേരുവകള്‍:
പൊതിനയില രണ്ട് ടേബിള്‍ സ്പൂണ്‍
ചെറുനാരങ്ങനീര് ഒരെണ്ണത്തിന്റെത്
പഞ്ചസാര പാകത്തിന്
തണുത്തവെള്ളം രണ്ട് ഗഌസ്
തയ്യാറാക്കുന്നവിധം:
പൊതിനയില ഒരുഗഌസ് തണുത്തവെള്ളം ചേര്‍ത്ത് മിക്‌സിയില്‍ അടിക്കുക. നന്നായി അടിച്ചതിനുശേഷം ഇത് അരിച്ചെടുക്കുക. പീന്നീട് ചെറുനാരങ്ങനീര് ചേര്‍ത്ത് പാകത്തിന് പഞ്ചസാരയിട്ട് ബാക്കി തണുത്തവെള്ളം ചേര്‍ത്ത് അടിച്ചെടുക്കാം. ഇതില്‍ പൊതിനയില, ചെറുനാരങ്ങ കഷ്ണം എന്നിവവെച്ച് അലങ്കരിക്കാം.

ബിലുംബി സ്‌ക്വാഷ്
ചേരുവകള്‍:
ഇടത്തരം പഴുപ്പുള്ള ബിലുംബിപ്പുളി മൂന്നുകപ്പ്
ചെറുനാരങ്ങനീര് ഒരെണ്ണത്തിന്റെത്
പഞ്ചസാര ഒരുകിലോഗ്രാം
വെള്ളം രണ്ടുഗഌസ്
ഏലക്കായ രണ്ടെണ്ണം
തയ്യാറാക്കുന്നവിധം:
ഇടത്തരം പഴുപ്പുള്ള ബിലുംബിപ്പുളി ഒരുഗഌസ് വെള്ളത്തില്‍ തിളപ്പിക്കുക. പുളി ഉടഞ്ഞ് വെള്ളത്തോടുചേര്‍ന്നു വന്നാല്‍ അതിലേക്ക് പഞ്ചസാര ചേര്‍ക്കുക. നന്നായി തിളച്ചാല്‍ ചെറുനാരങ്ങാനീര്, ഏലക്കായ എന്നിവ ചേര്‍ക്കുക. പിന്നീട് വാങ്ങി ചൂടാറിയാല്‍ തുണിയില്‍ അരിച്ചെടുത്ത് കുപ്പിയില്‍ തണുപ്പിച്ച് സൂക്ഷിക്കാം. ആവശ്യാനുസരണം എടുത്ത് തണുത്തവെള്ളത്തില്‍ ചേര്‍ത്ത് ഉപയോഗിക്കാം. പഞ്ചസാര പോരെങ്കില്‍ ചേര്‍ത്തുകൊടുക്കാം.

മല്ലിയില സര്‍ബത്ത്
ചേരുവകള്‍:
മല്ലിയില രണ്ട് ടേബിള്‍ സ്പൂണ്‍
ചെറുനാരങ്ങനീര് ഒരെണ്ണത്തിന്റെത്
നന്നാറി സര്‍ബത്ത് നാല് ടേബിള്‍ സ്പൂണ്‍
തണുത്തവെള്ളം ഒരു ഗഌസ്
തയ്യാറാക്കുന്നവിധം:
മല്ലിയില അല്പം വെള്ളമുപയോഗിച്ച് അടിച്ചെടുക്കുക. അതില്‍
ചെറുനാരങ്ങനീര് ചേര്‍ത്തതിനു ശേഷം നന്നാറി സര്‍ബത്ത്, തണുത്തവെള്ളം എന്നിവചേര്‍ത്ത് കലക്കിയാല്‍ മല്ലിയില സര്‍ബത്ത് റെഡിയായി.

പച്ചമാങ്ങ ജ്യൂസ്
മികച്ച ദാഹശമനിയും പ്രകൃതിപാനീയവുമാണ് പച്ചമാങ്ങ ജ്യൂസ്
ചേരുവകള്‍:
പച്ചമാങ്ങ തൊലിയൊഴിവാക്കി ചെത്തിയെടുത്തത് രണ്ട് കപ്പ്
ചെറുനാരങ്ങനീര് ഒരെണ്ണത്തിന്റെത്
പഞ്ചസാര (തേന്‍) നാല് ടേബിള്‍ സ്പൂണ്‍
തണുത്തവെള്ളം ഒരു ഗഌസ്
തയ്യാറാക്കുന്നവിധം:
പച്ചമാങ്ങ അല്പം വെള്ളമുപയോഗിച്ച് അടിച്ച് അരിച്ചെടുക്കുക. അതില്‍
ചെറുനാരങ്ങനീര് ചേര്‍ത്തതിനുശേഷം പഞ്ചസാര (തേന്‍), തണുത്തവെള്ളം എന്നിവചേര്‍ത്ത് കലക്കിയാല്‍ പച്ചമാങ്ങ ജ്യൂസ് റെഡിയായി. പഞ്ചസാര (തേന്‍) എന്നിവയ്ക്കുപകരം അല്പം ഉപ്പ്, ഒരുകഷ്ണം ഇഞ്ചി എന്നിവ ചേര്‍ത്തടിച്ചാല്‍ പ്രമേഹരോഗമുള്ളവര്‍ക്കും നല്ല പാനീയമാണ്.

പാഷന്‍ ഫ്രൂട്ട് ജ്യൂസ്
ചേരുവകള്‍:
പാഷന്‍ ഫ്രൂട്ട് തോടില്‍നിന്ന് ചുരണ്ടിയെടുത്തത് രണ്ടുകപ്പ്
ചെറുനാരങ്ങനീര് ഒരെണ്ണത്തിന്റെത്
തേന്‍ നാല് ടേബിള്‍ സ്പൂണ്‍
തണുത്തവെള്ളം ഒരു ഗഌസ്
തയ്യാറാക്കുന്നവിധം:
പാഷന്‍ ഫ്രൂട്ട് തോടില്‍നിന്ന് ചുരണ്ടിയെടുത്തത് അല്പം വെള്ളമുപയോഗിച്ച് അടിച്ച് അരിച്ചെടുക്കുക. അതില്‍
ചെറുനാരങ്ങനീര് ചേര്‍ത്തതിനുശേഷം തേന്‍, തണുത്തവെള്ളം എന്നിവചേര്‍ത്ത് മിക്‌സിയിലടിച്ചെടുക്കുക. തേനിനു പകരം പഞ്ചസാരയും നന്നാറി സര്‍ബത്തും ചേര്‍ത്തും പാഷന്‍ഫ്രൂട്ട് ജ്യൂസ് സ്വാദിഷ്ടമാക്കാം

കക്കിരി സര്‍ബത്ത്
ചേരുവകള്‍:
കക്കിരി തൊലിയൊഴിവാക്കി രാകിയെടുത്തത് രണ്ട് കപ്പ്
ചെറുനാരങ്ങനീര് ഒരെണ്ണത്തിന്റെത്
ഉപ്പ് പാകത്തിന്
മല്ലിയില രണ്ട് അല്ലി
തണുത്തവെള്ളം ഒരു ഗഌസ്
തയ്യാറാക്കുന്നവിധം:
കക്കിരി അല്പം വെള്ളമുപയോഗിച്ച് അടിച്ച് അരിച്ചെടുക്കുക. അതില്‍
ചെറുനാരങ്ങനീര് ചേര്‍ത്തതിനുശേഷം, ആവശ്യത്തിന് ഉപ്പ്, മല്ലിയില എന്നിവ ചേര്‍ത്ത് അടിച്ചതിനുശേഷം തണുത്തവെള്ളം ചേര്‍ത്ത് കലക്കിയാല്‍ കക്കിരി ജ്യൂസ് റെഡിയായി. കുടവറുള്ളവര്‍ക്ക് അതു കുറയ്ക്കാനും ഈ പാനീയം സ്ഥിരമായി ഉപയോഗിച്ചാല്‍ കഴിയും. ഉപ്പിനുപകരം സര്‍ബത്ത്, തേന്‍ എന്നിവ ചേര്‍ത്തും ഇത് തയ്യാറാക്കാം.

നെല്ലിക്ക-തേന്‍ ഡ്രിങ്ക്
ചേരുവകള്‍:
നെല്ലിക്ക കുരുവൊഴിവാക്കി മുറിച്ചെടുത്തത് ഒരു കപ്പ്
ചെറുനാരങ്ങനീര് ഒരെണ്ണത്തിന്റെത്
തേന്‍ കാല്‍ക്കപ്പ്
തണുത്തവെള്ളം ഒരു ഗഌസ്
തയ്യാറാക്കുന്നവിധം:
നെല്ലിക്ക അല്പം വെള്ളമുപയോഗിച്ച് അടിച്ചെടുക്കുക. അതില്‍
ചെറുനാരങ്ങനീര് ചേര്‍ത്തതിനുശേഷം തേന്‍ ചേര്‍ത്ത് അടിച്ച് തണുത്തവെള്ളം ചേര്‍ത്ത് കലക്കിയാല്‍ നെല്ലിക്കഹണി ഡ്രിങ്ക് റെഡിയായി.

ലസ്സി
പുളിക്കാത്ത തൈര് 1 കപ്പ്
വെള്ളം 2 കപ്പ്
പഞ്ചസാര രുചി അനുസരിച്ച്
ജാതിക്ക പൊടിച്ചത്

പാകം ചെയ്യേണ്ടവിധം:
തൈരില്‍ പഞ്ചസാരയും വെള്ളവും ചേര്‍ത്ത് ജാതിക്ക പൊടിച്ചതും ചേര്‍ത്ത് ഫ്രിഡ്ജില്‍ വച്ച് തണുപ്പിച്ച് ഉപയോഗിക്കാം.