വളാഞ്ചേരി: പാങ്ങാടച്ചിറ മാലിന്യ ദുരിതാവസ്ഥക്കു പരിഹാരമായില്ല. വളാഞ്ചേരി നഗരത്തിലെ മുഴുവന്‍ മാലിന്യവും ഒഴുകിയെത്തി അടിയുന്ന പാങ്ങാടച്ചിറയെ സംരക്ഷിക്കാന്‍ പദ്ധതികള്‍ പലതും ആവിഷ്‌കരിച്ചെങ്കിലും ഇതുസംബന്ധിച്ച വാഗ്ദാനങ്ങളും പ്രഖ്യാപനങ്ങളും പാഴ്‌വാക്കുകളായി.
ആധുനിക രീതിയിലുളള ട്രീറ്റ്‌മെന്റ ്പ്ലാന്റ് സ്ഥാപിക്കുമെന്നടക്കമുള്ള അധികൃതരുടെ വാഗ്ദാനങ്ങളാണ് പാഴ് വാക്കുകളായി മാറിയത്. നഗരത്തിലെ ഹോട്ടലുകള്‍, കടകള്‍, ആശുപത്രികള്‍ തുടങ്ങിയ സ്ഥാപനങ്ങളില്‍ നിന്ന് പുറത്തേക്കൊഴുകുന്ന മാലിന്യങ്ങള്‍ ഒഴുകി എത്തുന്നത് പങ്ങാടച്ചിറയിലാണ്. വേനല്‍ക്കാലമായതോടെ ചിറയില്‍ വെള്ളത്തിന്റെ ഒഴുക്കുനിലച്ചതിനാല്‍ അഴുക്കുവെള്ളവും മാലിന്യകൂമ്പാരവും കെട്ടിനില്‍ക്കുന്നത് പ്രദേശത്ത് ആരോഗ്യഭീഷണി ഉയര്‍ത്തുന്നു.
സമീപപ്രദേശത്തെ ആളുകളില്‍ ചൊറിച്ചില്‍ അനുഭവപ്പെടുന്നതായും വീടുകളിലെ കിണറുകളിലെ വെള്ളത്തിന് നിറം മാറ്റവും രുചി വ്യത്യാസവും അനുഭവപ്പെടുന്നതായി പ്രദേശത്തുകാര്‍ പരാതിപ്പെടുന്നു.
വ്യാപാര സ്ഥാപനങ്ങളില്‍ നിന്നു പുറത്തേക്ക് ഒഴുകുന്ന മാലിന്യം തടയുന്നതിനും കുഴിയൊരുക്കി അവിടങ്ങളില്‍ തന്നെ സംസ്‌ക്കരണം ലക്ഷ്യമാക്കി 'മിഷന്‍ 277'എന്ന പേരില്‍ നഗരസഭ പദ്ധതി ആവിഷ്‌ക്കരിച്ച് നടപ്പിലാക്കിയിരുന്നങ്കിലും ഇത് പിന്നീട് പാതിവഴില്‍ ഉപേക്ഷിക്കുകയായിരുന്നു.
പദ്ധതിയുമായി സഹകരിച്ച് പല സ്ഥാപനങ്ങളും മാലിന്യം പറത്തേക്ക് ഒഴുകുന്നത് തടയുകയും സ്വന്തമായി കുഴി ഒരുക്കി മാലിന്യ സംസ്‌ക്കരണം നടത്താന്‍ ശ്രമിക്കുകയും ചെയ്തു. എന്നാല്‍, ചില സ്ഥാപനങ്ങള്‍ ഇതുമായി സഹകരിക്കാന്‍ വിസമ്മതിച്ചതാണ് പദ്ധതി നടപ്പിലാക്കാന്‍ കഴിയാതെ ഉപേക്ഷിക്കാന്‍ കാരണമായി പറയപെടുന്നത്. ഒരുപ്രദേശത്തെ നൂറുകണക്കിനാളുകളുടെ കുടുവെള്ളം മുട്ടിക്കുന്ന പ്രശനത്തിന് പരിഹാരം ഇനിയും അകലെയാണ്.