വാഷിങ്ടണ്‍: കൊവിഡിനെ പ്രതിരോധിക്കുന്നതില്‍ മികച്ച പ്രവര്‍ത്തനങ്ങള്‍ കാഴ്ചവെച്ചത് ചൈന തന്നെയെന്ന് സമ്മതിച്ച് ലോകം. 53 രാജ്യങ്ങള്‍ക്കിടയില്‍ നടത്തിയ പോളിങ്ങിലാണ് ചൈനയുടെ പ്രവര്‍ത്തനങ്ങള്‍ മികച്ചതാണെന്ന അഭിപ്രായം ഉയര്‍ന്നുവന്നത്. ഏറ്റവും മോശം പ്രവര്‍ത്തനം കാഴ്ചവെച്ചത് അമേരിക്കയാണെന്നാണ് പൊതുവേയുള്ള വിലയിരുത്തല്‍.

അമേരിക്കന്‍ സ്റ്റേറ്റ് സെക്രട്ടറി മൈക്ക് പോംപിയോ, മുന്‍ സ്റ്റേറ്റ് സെക്രട്ടറി ജോണ്‍ കെറി, ഹോങ്കോങ് ജനാധിപത്യ പ്രവര്‍ത്തകനായ ജോഷ്വ വോങ് തുടങ്ങിയവര്‍ അഭിസംബോധന ചെയ്യുന്ന ജനാധിപത്യത്തിന്റെ ഭാവിയെക്കുറിച്ചുള്ള പ്രധാന സമ്മേളനം ഈയാഴ്ച നടക്കുന്നതിന് മുന്നോടിയായി നടത്തിയ സര്‍വേയിലാണ് അമേരിക്കക്ക് തിരിച്ചടിയായ അഭിപ്രായം ഉയര്‍ന്നുവന്നിരിക്കുന്നത്.

മുന്‍ നാറ്റോ സെക്രട്ടറി ജനറല്‍ ആന്‍ഡേഴ്‌സ് ഫോഗ് റാസ്മുസ്സന്റെ നേതൃത്വത്തിലുള്ള ജര്‍മന്‍ പോളിങ് കമ്പനിയായ ഡാലിയ റിസര്‍ച്ചും അലയന്‍സ് ഓഫ് ഡെമോക്രസീസ് ഫൗണ്ടേഷനും 53 രാജ്യങ്ങളിലെ 1,20,000 ആളുകള്‍ക്കിടയില്‍ നടത്തിയ സര്‍വേയിലാണ് യു.എസ് നേതൃത്വത്തോടുള്ള കടുത്ത അസംതൃപ്തി പ്രകടമായത്. 60 ശതമാനം ആളുകളും കൊവിഡിനെ നേരിടുന്നതില്‍ ചൈന മികച്ച പ്രവര്‍ത്തനം കാഴ്ചവെച്ചെന്ന് അഭിപ്രായപ്പെടുമ്പോള്‍ മൂന്ന് രാജ്യങ്ങള്‍ മാത്രമാണ് അമേരിക്ക കൊവിഡിനെ ചൈനയെക്കാള്‍ മികച്ച രീതിയില്‍ പ്രതികരിച്ചെന്ന് അഭിപ്രായപ്പെടുന്നത്.

കൊവിഡ് നിയന്ത്രിക്കുന്നതില്‍ തങ്ങളുടെ സര്‍ക്കാരിന്റെ പ്രകടനത്തില്‍ ഗ്രീസ് (89%), തായ്‌വാന്‍ (87%), അയര്‍ലന്‍ഡ് (87%), ദക്ഷിണ കൊറിയ, ഓസ്‌ട്രേലിയ, ഡെന്‍മാര്‍ക്ക് (86%) എന്നീ രാജ്യങ്ങളിലെ പൗരന്മാര്‍ സന്തുഷ്ടരാണെന്ന് സര്‍വേ പറയുന്നു. ബ്രസീല്‍, ഫ്രാന്‍സ്, ഇറ്റലി, യു.എസ്, യു.കെ എന്നിവയാണ് ഏറ്റവും ഒടുവില്‍ നില്‍ക്കുന്ന രാജ്യങ്ങള്‍.

ലോകത്ത് കൊവിഡ് ബാധിതരുടെ എണ്ണം 80 ലക്ഷത്തിലേക്ക് അടുക്കുകയാണ്. 79,82,822 പേര്‍ക്കാണ് ഇതുവരെ രോഗം സ്ഥിരീകരിച്ചിട്ടുള്ളത്. 24 മണിക്കൂറില്‍ രോഗം ബാധിച്ച് മരിച്ചത് 3,248 പേരാണ്. അമേരിക്കയില്‍ 24 മണിക്കൂറിനിടെ 19,223 പേര്‍ക്കാണ് പുതുതായി രോഗം സ്ഥിരീകരിച്ചത്. ഞായറാഴ്ച മാത്രം 326 പേര്‍ മരിച്ചു. 21,62,054 പേര്‍ക്കാണ് ആകെ രോഗം സ്ഥിരീകരിച്ചിട്ടുള്ളത്. അതേസമയം, ചൈനയിലെ ബെയ്ജിങ്ങില്‍ വീണ്ടും കൊവിഡ് വ്യാപിക്കുകയാണ്. അവിടെ പത്ത് മേഖലകളില്‍ ഇന്നലെ ലോക്ക് ഡൗണ്‍ പ്രഖ്യാപിച്ചു.