മട്ടാഞ്ചേരി: ഫുട്‌ബോള്‍ ലോക കപ്പ് മാമാങ്കം അരങ്ങ് തകര്‍ക്കുമ്പോള്‍ വ്യത്യസ്തമായ ഫ്‌ളക്‌സ് ശ്രദ്ധേയമാകുന്നു.മട്ടാഞ്ചേരി ചെറളായി തുണ്ടി പറമ്പിലാണ് ഇന്ത്യന്‍ ടീമിന്റെ ചിത്രം ആലേഖനം ചെയ്ത ഫ്‌ളക്‌സ് ഉയര്‍ന്നിരിക്കുന്നത്.
മറ്റ് രാജ്യങ്ങള്‍ക്ക് വേണ്ടി ആരാധകര്‍ ഫ്‌ളക്‌സുകള്‍ ഉയര്‍ത്തി ആവേശം പൊടി പാറിക്കുമ്പോള്‍ ഇന്ത്യന്‍ ടീമിന്റെ ഫ്‌ളക്‌സ് ഏറെ കൗതുകകരമാണ്. റെഡ് ഈഗില്‍സും കലക്കന്‍സുമാണ് ഇന്ത്യക്ക് വേണ്ടി ഫ്‌ളക്‌സ് ഉയര്‍ത്തിയിരിക്കുന്നത്.
'റഷ്യയിലേക്ക് ഞങ്ങളില്ല പക്ഷെ വന്നിരിക്കും ഒരു നാള്‍ ഞങ്ങള്‍ക്ക് അഹങ്കാരമില്ല, ഞങ്ങള്‍ക്ക് പറയാന്‍ ചരിത്രവുമില്ല, പക്ഷെ ഞങ്ങള്‍ ഒരു നാള്‍ വരും' എന്ന് എഴുതിയിരിക്കുന്ന ഫ്‌ളക്‌സ് ഇന്ത്യന്‍ ടീമിനെ ഇഷ്ടപ്പെടുന്ന ഒരു കൂട്ടം ചെറുപ്പക്കാരുടേതാണ്.
മറു നാടന്‍ രാജ്യങ്ങളേക്കാള്‍ ഞങ്ങള്‍ക്ക് പ്രിയം സ്വന്തം രാജ്യമാണെന്നും ഒരിക്കല്‍ ഞങ്ങളുടെ രാജ്യവും ലോക കപ്പില്‍ സ്ഥാനം പിടിക്കുമെന്നും ഇവര്‍ പറയുന്നു. ഉണ്ണി,ദിവ്യേശ്,ശശാങ്കന്‍,ശങ്കര്‍,മനോജ്,പ്രസാദ്,വിവേക് എന്നിവരാണ് റെഡ് ഈഗില്‍സിനും തുണ്ടി പറമ്പ് ഫ്രണ്ട്‌സിനും വേണ്ടി ഫ്‌ളക്‌സ് ഉയര്‍ത്തിയിരിക്കുന്നത്.