തിരുവനന്തപുരം: തലസ്ഥാനം സാമൂഹിക വ്യാപന ഭീതിയില്‍. നിലനില്‍ക്കുന്നതായി മുന്നറിയിപ്പു നല്‍കി മന്ത്രിയുടെ മുന്നറിയിപ്പ്. മന്ത്രി കടകംപള്ളി സുരേന്ദ്രനാണ് കോവിഡ് മാനദണ്ഡങ്ങള്‍ പാലിക്കാതിരിക്കുന്നത് രോഗവ്യാപനത്തിന് കാരണമാകുകയാണെന്നും മാനദണ്ഡങ്ങള്‍ പാലിക്കാത്തവര്‍ക്കെതിരെ കര്‍ശന നടപടി സ്വീകരിക്കുമെന്നും മന്ത്രി വ്യക്തമാക്കി. പ്രതിരോധ പ്രവര്‍ത്തനങ്ങളുടെ ഭാഗമായി നഗരത്തിലേക്കുളള വഴികളില്‍ നിയന്ത്രണം കൊണ്ടുവരുമെന്നും അദ്ദേഹം പറഞ്ഞു.

സാമൂഹിക വ്യാപനത്തിന് ഇടയാക്കുന്ന തരത്തിലാണ് ചിലര്‍ പ്രവര്‍ത്തിക്കുന്നത്. കടകളില്‍ പലതും മാനദണ്ഡങ്ങള്‍ പാലിക്കാതിരിക്കുന്നത് ശ്രദ്ധയില്‍പ്പെട്ടിട്ടുണ്ട്. സാമൂഹിക അകലം പാലിക്കുന്നില്ല. ശുചിത്വം ഉറപ്പാക്കാന്‍ സോപ്പും സാനിറ്റെസറും കടയില്‍ ലഭ്യമാക്കുന്നില്ല. അശ്രദ്ധയോടെ പെരുമാറുന്നവരുടെ കടകള്‍ അടപ്പിക്കുമെന്ന് കടകംപളളി സുരേന്ദ്രന്‍ പറഞ്ഞു. തലസ്ഥാന നഗരിയില്‍ ഫലപ്രദമായ രീതിയിലാണ് കൊവിഡ് പ്രതിരോധ പ്രവര്‍ത്തനങ്ങള്‍ നടന്നുവന്നത്. എന്നാല്‍ സമീപദിവസങ്ങളില്‍ കാണുന്ന കാഴ്ചകള്‍ ആശങ്കകള്‍ ഉയര്‍ത്തുന്നു.

ഗ്രാമീണ മേഖലയില്‍ ചന്തകള്‍ക്ക് സമാന്തരമായി വില്‍പ്പന നടക്കുന്നുണ്ട്. ചന്തയിലെ കടകള്‍ അടച്ചിട്ടാണ് ഇത്തരം സമാന്തര ചന്തകള്‍ പ്രവര്‍ത്തിക്കുന്നത്. ഇത് രോഗവ്യാപനത്തിന് കാരണമാകും. മാനദണ്ഡങ്ങള്‍ പാലിച്ച് ചന്തകള്‍ തുറന്നുപ്രവര്‍ത്തിക്കുന്നുണ്ട് എന്ന് ഉറപ്പുവരുത്തുമെന്നും മന്ത്രി പറഞ്ഞു. മേയര്‍, ജില്ലാ കലക്ടര്‍, ജില്ലാ പൊലിസ് മേധാവി, ജില്ലാ മെഡിക്കല്‍ ഓഫീസര്‍ തുടങ്ങിയവര്‍ പങ്കെടുത്ത കോര്‍കമ്മിറ്റി യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു മന്ത്രി.