കരുനാഗപ്പള്ളി: തേങ്ങാവണ്ടിയെന്ന വ്യാജേന ഒളിപ്പിച്ചുകടത്തിയ 884 ലിറ്റര്‍ സ്പിരിറ്റ് കരുനാഗപ്പള്ളിയില്‍ നിന്ന് എക്‌സൈസ് സംഘം പിടികൂടി. പിക്ക്അപ്പ് വാനും 26 കന്നാസ് സ്പിരിറ്റും കസ്റ്റഡിയിലെടുത്തു. ഇന്നലെ പുലര്‍ച്ചെ ആയിരുന്നു സംഭവം. പ്രതികളെ കണ്ടെത്താനായില്ല. തൊടിയൂര്‍ വേങ്ങറ അംബേദ്കര്‍ കോളനിക്കുസമീപം റോഡരുകില്‍ ആളില്ലാത്ത നിലയിലായിരുന്നു വണ്ടി കണ്ടെത്തിയത്.
തിരുവനന്തപുരം എക്‌സൈസ് കമ്മീഷണറുടെ സ്‌പെഷ്യല്‍ സ്‌ക്വാഡാണ്  സ്പിരിറ്റ്‌വേട്ട നടത്തിയത്. പ്രതികള്‍ക്കായി അന്വേഷണം ആരംഭിച്ചു. വണ്ടിയും സ്പിരിറ്റും എക്‌സൈസ് കരുനാഗപ്പള്ളി റേഞ്ച് ഓഫീസില്‍ എത്തിച്ചു. കമ്മീഷണര്‍ ഋഷിരാജ് സിംഗ് റേഞ്ച് ഓഫീസ് സന്ദര്‍ശിച്ചു.