ആലപ്പുഴ: ഹരിതനിയമാവലി  അഥവാ ഗ്രീന്‍ പ്രോട്ടോകോള്‍ അനുസരിച്ച് നടത്തുന്ന വിവാഹങ്ങള്‍ക്ക് ജില്ലാ കലക്ടറുടെ പ്രത്യേക സാക്ഷ്യപത്രം നല്‍കുമെന്ന് കലക്ടര്‍ വീണ എന്‍. മാധവന്‍ പറഞ്ഞു. മാതൃകാപരമായി അജൈവ മാലിന്യം സംസ്‌കരിക്കുന്നവരെ ജില്ലാ ഭരണകൂടം അംഗീകരിക്കുന്നതിന്റെ ഭാഗമായാണിത്.
 ശുചിത്വമിഷന്‍ കലക്ടറേറ്റില്‍ വിളിച്ചു ചേര്‍ത്ത സമുദായ സംഘടന, കാറ്ററിങ്, ഹോട്ടല്‍, വ്യവസായ, റസിഡന്‍സ് അസോസിയേഷന്‍ പ്രതിനിധികളുടെ യോഗത്തില്‍ സംസാരിക്കുകയായിരുന്നു കലക്ടര്‍. മാലിന്യത്തിന്റെ അളവ് കുറയ്ക്കുന്നതിന് ചില അടിസ്ഥാന സൗകര്യങ്ങള്‍ ഏര്‍പ്പെടുത്തണമെന്ന്  യോഗത്തില്‍ കലക്ടര്‍ വ്യക്തമാക്കി.
 അമ്പതില്‍ കൂടുതല്‍ പേര്‍ ഒരേസമയം ഇരിക്കാന്‍ കഴിയുന്ന ഹോട്ടല്‍, റസ്റ്റോറന്റ് എന്നിവയില്‍ ഉറവിട മാലിന്യ സംസ്‌കരണ സംവിധാനം ഉണ്ടാകണം. സിറോ വേസ്റ്റ് ആശയം നടപ്പാക്കാന്‍ അജൈവ വസ്തുക്കളുടെ ഉപയോഗം കുറയ്ക്കുക, പുനരുപയോഗം കൂട്ടുക, പുന:ചക്രമണം സാധ്യമാക്കുക എന്നിവ ശ്രദ്ധിക്കണം.
ഇതിനായി പ്ലാസ്റ്റിക് ഇവേസ്റ്റ് മാലിന്യങ്ങള്‍ പ്രത്യേകം തരം തിരിച്ചു ശേഖരിക്കണം. വിവാഹങ്ങള്‍ക്കും മറ്റ് പരിപാടികള്‍ക്കും ഗ്രീന്‍ പ്രോട്ടോകോള്‍ നടപ്പിലാക്കാന്‍ കഴുകി ഉപയോഗിക്കാന്‍ കഴിയുന്ന സ്റ്റീല്‍, സെറാമിക് പാത്രങ്ങള്‍, സ്റ്റീല്‍ ഗ്ലാസുകള്‍, കപ്പുകള്‍  എന്നിവ ഉപയോഗിക്കുക.
 ജൈവ മാലിന്യങ്ങള്‍ കമ്പോസ്റ്റ് ആക്കി  മാറ്റുന്നതിന് എയ്‌റോബിക് കമ്പോസ്റ്റ്, ബയോഗ്യാസ് പ്ലാന്റ് എന്നിവ ഉണ്ടാക്കണം. അജൈവ മാലിന്യങ്ങള്‍ പ്ലാസ്റ്റിക്ക് ഹാളിന്റെ പരിസരത്ത് കത്തിക്കുകയോ കുഴിച്ചു മൂടുകയോ ചെയ്യരുത്. മിനറല്‍ വാട്ടറിന് പകരം തിളപ്പിച്ചാറിയ വെളളം കൊടുക്കാന്‍ ശ്രമിക്കുക എന്നീ നിര്‍ദേശങ്ങളും പാലിക്കണം.