ലണ്ടന്‍: സ്വന്തം തട്ടകത്തില്‍ എവേ ഗോള്‍ വഴങ്ങി അധിക സമയത്ത് മത്സരം പിടിച്ചെടുത്ത് മാഞ്ചസ്റ്റര്‍ യുനൈറ്റഡ് യുവേഫ യൂറോപ്പ ലീഗിന്റെ സെമിയിലേക്ക് മുന്നേറി. ബെല്‍ജിയം ക്ലബ് അന്റര്‍ലെറ്റിനെ സ്വന്തം മൈതാനമായ ഓള്‍ഡ് ട്രാഫോര്‍ഡില്‍ അരങ്ങേറിയ രണ്ടാം പാദ പോരാട്ടത്തില്‍ 2-1ന് തകര്‍ത്ത് ഇരു പാദങ്ങളിലുമായി 3-2ന്റെ വിജയം പിടിച്ചാണ് ചുകന്ന ചെകുത്താന്‍മാരുടെ സെമി പ്രവേശം. ആന്റര്‍ലെറ്റിന്റെ മണ്ണില്‍ അരങ്ങേറിയ ആദ്യ പാദത്തില്‍ 1-1ന് സമനില പിടിച്ച അവര്‍ എവേ ഗോളിന്റെ ആനുകൂല്യവുമായി രണ്ടാം പാദത്തിനിറങ്ങുകയായിരുന്നു. കളിയുടെ പത്താം മിനുട്ടില്‍ മിഖിതാര്യന്‍ അവരെ മുന്നില്‍ കടത്തിയെങ്കിലും 32ാം മിനുട്ടില്‍ ഗോള്‍ മടക്കി ആന്റര്‍ലെറ്റ് എവേ ഗോള്‍ പിടിച്ചതോടെ മാഞ്ചസ്റ്റര്‍ സമ്മര്‍ദത്തിലായി. പിന്നീട് ഇരു ഭാഗത്തും ഗോള്‍ പിറന്നില്ല. മത്സരം അധിക സമയത്തേക്ക് നീണ്ടു. അധിക സമയത്തിന്റെ 107ാം മിനുട്ടില്‍ യുവ വിസ്മയം മാര്‍ക്കസ് റാഷ്‌ഫോര്‍ഡിന്റെ നിര്‍ണായക ഗോള്‍ മാഞ്ചസ്റ്ററിന് യൂറോപ്പ ലീഗിന്റെ അവസാന നാലില്‍ ഇടം ഒരുക്കി. മത്സരത്തിനിടെ മാഞ്ചസ്റ്ററിന് രണ്ട് നഷ്ടങ്ങളും സംഭവിച്ചു. മുന്നേറ്റത്തിലെ നിര്‍ണായക താരം സ്ലാട്ടന്‍ ഇബ്രാഹിമോവിചും പ്രതിരോധ താരം മാര്‍ക്കസ് റോജോയും മുട്ടിന് ഗുരുതര പരുക്കേറ്റ് കളം വിട്ടത് അവര്‍ക്ക് കനത്ത തിരിച്ചടിയാണ്. സെമി പോരാട്ടങ്ങളില്‍ ഇരുവരും കളിക്കുന്ന കാര്യം അനിശ്ചിതത്വത്തിലായി.
മറ്റു മത്സരങ്ങളില്‍ ഒളിംപിക്ക് ലിയോണ്‍, സെല്‍റ്റ വിഗോ, അയാക്‌സ് ടീമുകളും സെമി ബര്‍ത്ത് ഉറപ്പിച്ചു. ലിയോണ്‍ പെനാല്‍റ്റിയിലേക്ക് നീണ്ട പോരാട്ടത്തില്‍ 7-6ന് ബെസിക്റ്റസിനെ കീഴടക്കി. ഇരു പാദ പോരാട്ടം 3-3ന് സമനിലയായതോടെയാണ് മത്സരം പെനാല്‍റ്റിയിലേക്ക് നീണ്ടത്. സെല്‍റ്റ വിഗോ ജെങ്കിനെ ഇരു പാദങ്ങളിലായി 4-3ന് പരാജയപ്പെടുത്തി. അയാക്‌സ് രണ്ടാം പാദ മത്സരം തോറ്റെങ്കിലും ആദ്യ പാദത്തിലെ രണ്ട് ഗോള്‍ വിജയവും രണ്ടാം പാദത്തിലെ രണ്ട് എവേ ഗോളുകളും അവര്‍ക്ക് തുണയായി. ഇരു പാദങ്ങളിലായി മത്സരം അവര്‍ 4-3ന് വിജയിച്ചു.
സെമി പോരാട്ടങ്ങളില്‍ മാഞ്ചസ്റ്റര്‍ യുനൈറ്റഡ്- സെല്‍റ്റ വിഗോയുമായും അയാക്‌സ്- ലിയോണുമായും ഏറ്റുമുട്ടും.