തിരുവനന്തപുരം: പത്മനാഭസ്വാമി ക്ഷേത്രത്തിന് സമീപത്തെ ക്ഷേത്രക്കുളം ഏറ്റെടുക്കാന്‍ മന്ത്രിസഭാ യോഗം തീരുമാനിച്ചു. വിദ്യാധിരാജ സഭ കൈവശം വച്ചിരിക്കുന്ന 65 സെന്റ് സ്ഥലമാണ് ഏറ്റെടുക്കുക. ഇതുസംബന്ധിച്ച റവന്യൂ വകുപ്പിന്റെ ശുപാര്‍ശ മന്ത്രിസഭ അംഗീകരിക്കുകയായിരുന്നു.
സര്‍ക്കാര്‍ ഭൂമി കൈയേറി, ഭൂമിക്ക് നല്‍കേണ്ട കരം അടച്ചില്ല, വ്യവസ്ഥകള്‍ക്ക് വിരുദ്ധമായി കെട്ടിടം നിര്‍മിച്ചു എന്നീ കാരണങ്ങള്‍ ചൂണ്ടിക്കാട്ടിയാണ് സ്ഥലം ഏറ്റെടുക്കുന്നത്.
കിഴക്കേക്കോട്ടയിലെ വെള്ളക്കെട്ടിന് പരിഹാരംകാണാന്‍ പാത്രക്കുളം സംരക്ഷിക്കണമെന്ന് ഓപറേഷന്‍ അനന്തയുടെ ഭാഗമായി തീരുമാനിച്ചിരുന്നു. അതേസമയം, സര്‍ക്കാരിനെ ചിലര്‍ തെറ്റിദ്ധരിപ്പിച്ചിരിക്കുകയാണെന്നും ഗൂഢലക്ഷ്യമുണ്ടെന്ന് കരുതുന്നില്ലെന്നും വിദ്യാധിരാജ സഭ അധ്യക്ഷനും മുന്‍ ചീഫ് സെക്രട്ടറിയുമായ ആര്‍. രാമചന്ദ്രന്‍നായര്‍ പറഞ്ഞു. സര്‍ക്കാര്‍ തീരുമാനത്തിനെതിരേ നിയമ നടപടി സ്വീകരിക്കുമെന്നും അദ്ദേഹം പറഞ്ഞു.
പത്മനാഭസ്വാമി ക്ഷേത്രത്തിന് ചുറ്റുമുള്ള അതീവ സുരക്ഷാ മേഖലയിലുള്ള പ്രധാന കൈയേറ്റങ്ങളിലൊന്നാണ് ഒഴിപ്പിക്കുന്നത്. എന്നാല്‍, ഓപറേഷന്‍ അനന്തയുടെ ഭാഗമായി കണ്ടെത്തിയ മറ്റ് കൈയേറ്റങ്ങളുടെ കാര്യത്തില്‍ ഇതുവരെ തുടര്‍നടപടികളുണ്ടായിട്ടില്ല.