ന്യൂഡല്‍ഹി: അന്താരാഷ്ട്ര വ്യവഹാരങ്ങളുടെ പ്രധാന കേന്ദ്രമായി ഇന്ത്യ മാറുകയാണെന്ന് സുപ്രിംകോടതി ചീഫ് ജസ്റ്റിസ് ജെ.എസ് ഖെഹാര്‍. ഈ പ്രക്രിയയില്‍ സര്‍ക്കാര്‍ ഇടപെടല്‍ ഇല്ലാതിരുന്നാല്‍ വിദേശ വ്യാപാരികളില്‍ വിശ്വാസം വര്‍ദ്ധിപ്പിക്കാനാകുമെന്നും അദ്ദേഹം പറഞ്ഞു. 

വിദേശ നിക്ഷേപങ്ങള്‍ കാരണം അന്താരാഷ്ട്ര വ്യവഹാരത്തിനുള്ള സാധ്യത വര്‍ധിച്ചുകൊണ്ടിരിക്കുകയാണ്. ഡല്‍ഹിയില്‍ കഴിഞ്ഞ രണ്ടു ദിവസമായി നടന്ന എന്‍ഗേജിങ് ഏഷ്യാ ആര്‍ബിട്രേഷന്‍ ഉച്ചകോടിയില്‍ സംസാരിക്കുകയായിരുന്നു ചീഫ് ജസ്റ്റിസ്. സര്‍ക്കാരിന്റെ മേക്ക് ഇന്‍ ഇന്ത്യ പദ്ധതിവഴി രാജ്യത്ത് മികച്ച നേട്ടമുണ്ടാക്കാനാകുമെന്നും ഇന്ത്യയെ ഒരു ശ്രേഷ്ഠമായ കമ്പോളമായി വളര്‍ത്താന്‍ ഇടയാക്കുമെന്നും അദ്ദേഹം കൂട്ടിച്ചേര്‍ത്തു. സര്‍ക്കാരിന്റെ ഉയര്‍ന്ന തലത്തിലുള്ള ആസൂത്രണമുള്ളതിനാല്‍ സര്‍ക്കാരിനോ അതിന്റെ ഏജന്‍സികള്‍ക്കോ അന്താരാഷ്ട്ര വ്യവഹാരങ്ങളില്‍ ഇടപെടാനാകില്ലെന്നും ചീഫ് ജസ്റ്റിസ് കൂട്ടിച്ചേര്‍ത്തു.
സര്‍ക്കാരിന്റെ ഇടപെടല്‍ ഇല്ലാതിരുന്നാല്‍ രാജ്യത്ത് വ്യവഹാരങ്ങള്‍ നടത്തുന്നതിന് വ്യാപാരികള്‍ക്ക് കൂടുതല്‍ ആത്മ വിശ്വാസം നല്‍കാനാകും. സമര്‍ഥരായ അഭിഭാഷകരുടെയും മധ്യസ്ഥന്‍മാരുടെയും കേന്ദ്രമാണ് ഇന്ത്യ. ഭാവിയില്‍ ഏഷ്യയിലെ അന്താരാഷ്ട്ര വാണിജ്യ വ്യവഹാരങ്ങള്‍ ഇന്ത്യയില്‍ നിന്ന് ആരംഭിക്കേണ്ടതാണെന്നും ജസ്റ്റിസ് ഖെഹാര്‍ പറഞ്ഞു.