പെരുമ്പാവൂര്‍: കാറിന്റെ വാടക കൊടുക്കാത്തതിന്റെ വൈരാഗ്യത്താല്‍ യുവാവിനെ തട്ടിക്കൊണ്ടുപോയ സംഘത്തെ പൊലിസ് പിടികൂടി. പാലക്കാട് ജില്ലക്കാരായ അര്‍ഷാദ്, വിജയന്‍, ദീപു, ഹസ്സന്‍, സെയ്തു മുഹമ്മദ്, മുഹമ്മദ്, അജീഷ്, ഷിബിന്‍ എന്നിവരെയാണ് പെരുമ്പാവൂര്‍ പൊലിസ് പിടികൂടിയത്. പെരുമ്പാവൂര്‍ ഒക്കല്‍ ഭാഗത്തുള്ള സണ്‍മൂണ്‍ എന്ന ഹോട്ടലിനു മുന്‍ വശത്തായിരുന്നു സംഭവം.
വാടകയ്ക്ക് നല്‍കിയ കാറിന്റെ വാടക കൊടുക്കാത്തതിനെത്തുടര്‍ന്ന് സണ്‍മൂണ്‍ ഹോട്ടലിലെ ജോലിക്കാരനെ കാറില്‍ കയറ്റി കൊണ്ടുപോകും വഴി പൊലിസ് എത്തി പ്രതികളെയും വാഹനവും കസ്റ്റഡിയില്‍ എടുക്കുകയായിരുന്നു.
പെരുമ്പാവൂര്‍ സി.ഐ ഉമേഷ്, എസ്.ഐമാരായ ലൈസാദ്, മുഹമ്മദ്, കെ.പി എല്‍ദോസ്, എ.എസ്.ഐ രാജേന്ദ്രന്‍ എന്നിവര്‍ ചേര്‍ന്നാണ് പ്രതികളെ അറസ്റ്റ് ചെയ്തത്. കോടതിയില്‍ ഹാജരാക്കിയ പ്രതികളെ റിമാന്റ് ചെയ്തു.