ഹമീദ് കുണിയ

കാഞ്ഞങ്ങാട്: മുസ്‌ലിം ജില്ലാ വൈസ് പ്രസിഡന്റും മുതിര്‍ന്ന നേതാവുമായ പി. മുഹമ്മദ് കുഞ്ഞി മാസ്റ്ററുടെ വിയോഗം ജില്ലയില്‍ കനത്ത നഷ്ടമാണുണ്ടാക്കിയത്. ഹരിത രാഷ്ട്രീയത്തില്‍ ജില്ലയില്‍ പക്വതയും പാകതയും നേടിയിരുന്ന മുഹമ്മദ് കുഞ്ഞി മാസ്റ്റര്‍ ചെറുപ്പത്തില്‍ തന്നെ മികച്ച സംഘടനാ പാടവം പ്രകടിപ്പിച്ചിരുന്നു. പല പൊതുസമ്മേളനങ്ങളിലും പ്രസംഗം പരിഭാഷപ്പെടുത്താനുള്ള അവസരം ജില്ലയില്‍ ലഭിച്ചിരുന്നത് മുഹമ്മദ് കുഞ്ഞി മാസ്റ്റര്‍ക്കായിരുന്നു. അദ്ദേഹത്തിന്റെ ലളിതഭാഷയിലുള്ള പരിഭാഷ ഏവര്‍ക്കും ഉള്‍ക്കൊള്ളാന്‍ കഴിയുന്നതരത്തിലുള്ളതായിരുന്നു. മുസ്‌ലിം ലീഗ് അഖിലേന്ത്യാ പ്രസിഡന്റുമാരായിരുന്ന ബനാത്ത്‌വാല, ഇബ്രാഹിം സുലൈമാന്‍ തുടങ്ങിയ നേതാക്കള്‍ ജില്ലയിലെ സമ്മേളനങ്ങളിലെത്തുമ്പോള്‍ പരിഭാഷകനായി എത്തുക മുഹമ്മദ് കുഞ്ഞി മാസ്റ്ററായിരുന്നു.
വിനയവും ഒപ്പം കൃത്യ നിഷ്ഠതയും കൈമുതലാക്കിയിരുന്ന അദ്ദേഹം ജില്ലയില്‍ രാഷ്ട്രീയ-സാമൂഹ്യ രംഗത്ത് നിറഞ്ഞു നില്‍ക്കുകയും ചെയ്തു. ലീഗിന്റെ പഴയകാല ചരിത്രങ്ങളും നേതാക്കളുടെ പ്രവര്‍ത്തനങ്ങളും ആര്‍ക്കും ഏതു സമയത്തും ചോദിച്ചാല്‍ വളരെ കൃത്യമായി ലഭിക്കുമെന്നതും അദ്ദേഹത്തിന്റെ പ്രത്യേകതയാണ്. മികച്ച രാഷ്ട്രീയ സാമൂഹ്യ പ്രവര്‍ത്തകനും സംഘാടകനും പ്രഭാഷകനും എഴുത്തുകാരനുമൊക്കെയായിരുന്ന അദ്ദേഹം അവസാന സമയം വരെ കര്‍മരംഗത്ത് സജീവമായിരുന്നു.
നേതാക്കളും പ്രവര്‍ത്തകരും തമ്മില്‍ വലിയ അന്തരങ്ങളൊന്നുമില്ലെന്ന് അദ്ദേഹം തന്റെ ജീവിതത്തില്‍ കൂടി തെളിയിക്കുകയും ചെയ്തിരുന്നു. ഇതര രാഷ്ട്രീയ പ്രവര്‍ത്തകരോട് പോലും തന്റെ സ്വതസിദ്ധമായ ശൈലിയില്‍ നര്‍മം കലര്‍ന്ന ഭാഷായില്‍ ഇടപഴകിയിരുന്ന മാസ്റ്ററുടെ വിയോഗം മുസ്‌ലിം പ്രസ്ഥാനത്തിനും കാഞ്ഞങ്ങാട്ടെ സാമൂഹ്യ-സാംസ്‌കാരിക മേഖലക്കും കനത്ത നഷ്ടമാണ് ഉണ്ടാക്കിയത്. പുതു തലമുറയ്ക്ക് പ്രസ്ഥാനത്തിന്റെ ചരിത്രം പകര്‍ന്നു നല്‍കിയിരുന്ന മാസ്റ്റര്‍ പ്രസ്ഥാനത്തില്‍ ആളുകളെ ഉറപ്പിച്ചു നിര്‍ത്തുന്നതിലും നിസ്തുലമായ പ്രവര്‍ത്തനങ്ങള്‍ നടത്തിയിരുന്നു.
മുസ്‌ലിം ലീഗ് പോഷക സംഘടനയായ എം.എസ്.എഫില്‍ കൂടി പൊതുരംഗത്ത് വന്ന മാസ്റ്റര്‍ കാഞ്ഞങ്ങാട് ശാഖാ പ്രസിഡന്റ് , ഹൊസ്ദുര്‍ഗ് താലൂക്ക് ജനറല്‍ സെക്രട്ടറി, പ്രസിഡന്റ്, ഉപദേശക സമിതി ചെയര്‍മാന്‍ എന്നീ പദവികള്‍ വഹിച്ചതിനു പുറമെ അവിഭക്ത കണ്ണൂര്‍ ജില്ലാ മുസ്‌ലിം യൂത്ത് ലീഗ് ജനറല്‍ സെക്രട്ടറി, പ്രസിഡന്റ്, കെ.എസ്.ടി.യു ജില്ലാ പ്രസിഡന്റ്, എസ്.ടി.യു മോട്ടോര്‍ തൊഴിലാളി സ്ഥാപക പ്രസിഡന്റ്, യൂത്ത് ലീഗ് സംസ്ഥാന സെക്രട്ടറി പദവികളും വഹിച്ചു.
അജാനൂര്‍ പഞ്ചായത്ത് മെംബര്‍, കേരള ഫിഷര്‍മാന്‍ കോര്‍പറേഷന്‍ ഡയരക്ടര്‍, കെ.എസ്.ആര്‍.ടി.സി ഉപദേശക സമിതി അംഗം, ഒയില്‍ പാം ഇന്ത്യ ലിമിറ്റഡ് ചെയര്‍മാന്‍, റെയില്‍വേ യൂസേര്‍സ് ഫോറം അംഗം എന്നീ പദവികളും വഹിച്ചിരുന്നു. 1982ല്‍ ഉദുമ നിയോജക മണ്ഡലത്തില്‍ യു.ഡി.എഫ് സ്ഥാനാര്‍ഥിയായും മത്സരിച്ചിരുന്നു.
അതിഞ്ഞാല്‍ അജാനൂര്‍ ഗവ. മാപ്പിള എല്‍.പി സ്‌കൂള്‍, മാണിക്കോത്ത് ഗവ. യു.പി സ്‌കൂള്‍, കാഞ്ഞങ്ങാട് ദുര്‍ഗാ ഹൈസ്‌കൂള്‍, പടന്നക്കാട് ശ്രീ നാരായണ ടീച്ചേര്‍സ് ട്രെയിനിങ് സ്‌കൂളില്‍നിന്ന് പഠനം പൂര്‍ത്തിയാക്കി 1970ല്‍ ചിത്താരി എ.യു.പി സ്‌കൂളില്‍ അധ്യാപകനായി ഔദ്യോഗിക ജീവിതം തുടങ്ങി. ചന്ദ്രിക ദിനപത്രത്തിന്റെ കാഞ്ഞങ്ങാട് ലേഖകനായും സേവനമനുഷ്ടിച്ചിട്ടുണ്ട്. ദീര്‍ഘ കാലം കാഞ്ഞങ്ങാട് സംയുക്ത ജമാഅത്ത് 'വൈസ് പ്രസിഡന്റായും പ്രവര്‍ത്തിച്ചിരുന്നു.
മുന്‍ മുഖ്യമന്ത്രി സി.എച്ച് മുഹമ്മദ് കോയ പുരസ്‌കാരവും മാസ്റ്റര്‍ നേടിയിരുന്നു.