കയ്പ്പമംഗലം: ഭൂമിയുടെ അവകാശികള്‍ മനുഷ്യന്‍ മാത്രമല്ല എല്ലാ ജീവജാലങ്ങള്‍ക്കും ഇവിടെ ഇടമുണ്ടെന്നു സമര്‍ഥിച്ച ബഷീറിന്റെ വാക്കുകളെ അന്വര്‍ത്തമാക്കുകയാണ് കഴിമ്പ്രം വാഴപ്പുള്ളി ക്ഷേത്രവും ജീവനക്കാരും. രണ്ടു ദിവസം മുന്‍പാണ് ഓഫിസ് സെക്രട്ടറിയായ സതീഷ് ഓഫിസിലിരിക്കെ ചുറ്റുമതിലിനകത്ത് നിന്ന് കാക്കകളുടെ കലപില ശബ്ദവും പുറത്ത് നായ്ക്കളെയും കാണുന്നത്. സംഭവം നോക്കിയപ്പോഴാണ് ആല്‍മരത്തിന് താഴെയായി കോഴിക്കുഞ്ഞിനോളം വലുപ്പമുള്ള രണ്ടു മയില്‍കുഞ്ഞുങ്ങള്‍ ശ്രദ്ധയില്‍പ്പെടുന്നത്.

കാക്കകളുടെ ഉപദ്രവത്തില്‍ നിന്ന് ഓടിയൊളിക്കാന്‍ പാടുപെട്ട ഇവരെ വേഗം കൂടിനകത്താക്കി ഓഫിസില്‍ സൂക്ഷിച്ചു. മണിക്കൂറുകള്‍ കഴിഞ്ഞപ്പോള്‍ വീണ്ടും ശബ്ദം കേട്ട് നോക്കിയപ്പോള്‍ മൂന്ന് കുഞ്ഞുങ്ങള്‍ കൂടി. അങ്ങനെ അഞ്ചു കുഞ്ഞുങ്ങള്‍ക്കും ക്ഷേത്രത്തിലെ വഴിപാട് കൗണ്ടറില്‍ അഭയമൊരുക്കി. മേഖലയില്‍ ധാരാളമായി മയിലുകള്‍ കണ്ടു വരുന്ന പ്രദേശമാണിത്. ചെറിയ കുറ്റിക്കാടും മറ്റും ധാരാളമുള്ളതിനാല്‍ മയിലുകള്‍ കൂട്ടത്തോടെ ഇവിടെ എത്തുന്നു. കനത്ത കാറ്റിലും മഴയിലും കൂടിന് കേടുപാടുകള്‍ പറ്റിയതാകാം മയില്‍ കുഞ്ഞുങ്ങള്‍ താഴെ വീഴാന്‍ കാരണം. സംഭവം ഉടനെ വനം വകുപ്പ് അധികൃതരെ അറിയിച്ചെങ്കിലും വനത്തില്‍ കൊണ്ട് പോയി വിട്ടാല്‍ അതിജീവനത്തിനുള്ള പ്രായമാകാത്തതിനാല്‍ ക്ഷേത്രത്തില്‍ തന്നെ സംരക്ഷിക്കാനാണ് മറുപടി നല്‍കിയത്. തണുത്ത കാലാവസ്ഥയായതിനാല്‍ രാത്രിയും പകലും ഇലക്ട്രിക്ക് ബള്‍ബ് കൂടിനകത്ത് സ്ഥാപിച്ചിട്ടുണ്ട്. കോഴിക്കുഞ്ഞുങ്ങള്‍ക്ക് നല്കാറുള്ള ചെറിയ സ്റ്റാര്‍ട്ടര്‍ തീറ്റയാണ് ഇവര്‍ക്കും നല്‍കുന്നത്. ഇന്നലെ രാവിലെ വെറ്റിനറി ഡോക്ടര്‍ സ്ഥലത്തെത്തി ആവശ്യമായ ശുശ്രൂഷയും നല്‍കി. താഴെ വീണതിനാല്‍ ഒരു കുഞ്ഞിന്റെ കാലിന് നേരിയ പരുക്കുകള്‍ ഒഴിച്ചാല്‍ എല്ലാവരും ആരോഗ്യവാന്മാരാണ്. കുഞ്ഞുങ്ങളെ നോക്കി സാദാസമയവും അമ്മ മയില്‍ പുറത്തുണ്ട്. എന്നാല്‍ മറ്റു ജന്തുക്കള്‍ ഉപദ്രവിക്കുന്നതിനാല്‍ കുഞ്ഞുങ്ങളെ കൂടെ കൊണ്ട് പോകാന്‍ കഴിയുന്നില്ല. തള്ളമയിലിന് കൊണ്ട് പോകാന്‍ സാധിക്കും വരെ ഈ ഭൂമിയുടെ അവകാശികള്‍ക്ക് വാഴപ്പുള്ളി ക്ഷേത്രത്തില്‍ ഇടമുണ്ടാകും.