ന്യൂഡല്‍ഹി: പ്രധാനമന്ത്രി നരേന്ദ്രമോദിയെ ഒരിക്കലൂടെ പരസ്യമായി സംവാദത്തിനു വെല്ലുവിളിച്ച് കോണ്‍ഗ്രസ് അധ്യക്ഷന്‍ രാഹുല്‍ഗാന്ധി.
അഴിമതിയെക്കുറിച്ച് തുറന്ന സംവാദത്തിനുണ്ടോയെന്നും ഭയമാണെങ്കില്‍ ചര്‍ച്ച ചെയ്യേണ്ട വിഷയങ്ങള്‍ പറഞ്ഞുതരാമെന്നും അങ്ങിനെയാവുമ്പോള്‍ സംവാദം എളുപ്പമാകുമെന്നും രാഹുല്‍ പറഞ്ഞു. ട്വിറ്ററിലൂടൊയിരുന്നു രാഹുലിന്റെ വെല്ലുവിളി. 1. റഫാല്‍ + അനില്‍ അംബാനി, 2. നീരവ് മോദി, 3. അമിത് ഷാ + നോട്ട് നിരോധനം. എന്നിവയാണ് വിഷയങ്ങളെന്നും രാഹുല്‍ ട്വിറ്ററില്‍ കുറിച്ചു. അതേസമയം, ബി.ജെ.പിയുടെ പ്രകടനപത്രിക ഒറ്റപ്പെട്ട മനുഷ്യന്റെ ശബ്ദമാണെന്ന് മറ്റൊരു ട്വിറ്റര്‍ കുറിപ്പില്‍ രാഹുല്‍ ഗാന്ധി അഭിപ്രായപ്പെട്ടു. ധാര്‍ഷ്ട്യം നിറഞ്ഞതും ദീര്‍ഘവീക്ഷണം ഇല്ലാത്തതുമാണ് ബി.ജെ.പിയുടെ പത്രിക. അതിലൊരിക്കലും ജനങ്ങളുടെ അഭിപ്രായമില്ലെന്നും രാഹുല്‍ ട്വീറ്റ് ചെയ്തു. നീണ്ട ചര്‍ച്ചകള്‍ക്കുശേഷമാണ് കോണ്‍ഗ്രസിന്റെ പ്രകടനപത്രിക തയാറാക്കിയത്. കോടിക്കണക്കിന് ഇന്ത്യക്കാരുടെ ശബ്ദമാണത്.
ശക്തവും ജ്ഞാനമുള്ളതുമാണ് പ്രകടനപത്രിക. എന്നാല്‍, അടച്ചിട്ട മുറിയില്‍ തയാറാക്കിയ പത്രികയാണ് ബി.ജെ.പിയുടെതെന്നും രാഹുല്‍ പറഞ്ഞു. ബി.ജെ.പിയുടെ പ്രകടന പത്രിക വെറും നാട്യം മാത്രമാണെന്ന് മുതിര്‍ന്ന കോണ്‍ഗ്രസ് നേതാവ് കപില്‍ സിബലും ആരോപിച്ചു. തിങ്കളാഴ്ച സങ്കല്‍പ് പത്ര എന്ന പേരില്‍ ബി.ജെ.പി പുറത്തിറക്കിയ പത്രികയില്‍ ഒന്നുമില്ലെന്നും പാര്‍ട്ടിയുടെ ഏറ്റവും പുതിയ കപടതയാണ് ഇതെന്നും സിബല്‍ പറഞ്ഞു.