പെരുമണ്ണ : സര്‍ക്കാരിന്റെ വിവിധ വകുപ്പുകളില്‍ ലാസ്റ്റ് ഗ്രേഡ് സര്‍വന്റ് നിയമനത്തിനുളള പി.എസ്.സി. വിജ്ഞാപനങ്ങള്‍ക്ക് ഇനിമുതല്‍ ബിരുദധാരികള്‍ക്ക് അപേക്ഷിക്കാനാകില്ല. ഈ തസ്തികയുടെ യോഗ്യത പരിഷ്‌കരിച്ച് വിശേഷാല്‍ചട്ടം സര്‍ക്കാര്‍ ഭേദഗതി ചെയ്തു.അതിന്റെ വിജ്ഞാപനം ജൂണ്‍ നാലിന് പ്രസിദ്ധീകരിച്ചു.

ലാസ്റ്റ് ഗ്രേഡ് തസ്തികയുടെ അടിസ്ഥാന യോഗ്യത ഏഴാം ക്ലാസ് വിജയമാണ്. ചില തസ്തികകള്‍ക്ക് പ്രവ്യത്തിപരിചയവും നിശ്ചയിച്ചിട്ടുണ്ട്. ഈ യോഗ്യതകള്‍ അനുസരിച്ചായിരിക്കും ലാസ്റ്റ് ഗ്രേഡ് സര്‍വന്റ് തസ്തികയിലേക്ക് പുതിയ വിജ്ഞാപനം പി.എസ്.സി തയാറാക്കുക. അടുത്ത വര്‍ഷം ഡിസംബറിലായിരിക്കും വിജ്ഞാപനം പ്രസിദ്ധീകരിക്കുക. 14 ജില്ലകള്‍ക്കും ഈ തസ്തികയ്ക്ക് നിലവില്‍ റാങ്ക് പട്ടികയുണ്ട്. 2018 ജൂണ്‍ 29 -ന് അവയുടെ കാലാവധി അവസാനിക്കും. അതില്‍ നിന്നുളള നിയമനങ്ങളെ ഇപ്പോഴത്തെ ഭേദഗതി ബാധിക്കില്ല.

വിദ്യാഭ്യാസ യോഗ്യത നിഷ്‌കര്‍ഷിക്കാത്ത തസ്തികയായിരുന്നു ലാസ്റ്റ് ഗ്രേഡ് സര്‍വന്റ് . എഴുത്തും വായനയും അറിയുന്നവര്‍ക്കെല്ലാം അപേക്ഷിക്കാന്‍ പി.എസ്.സി. അവസരം നല്‍കിയിരുന്നു. പി.എസ്.സിയുടെ ഒരോ വിജ്ഞാപനത്തിനും പതിനഞ്ചുലക്ഷം അപേക്ഷകളാണ് ലഭിക്കുന്നത്. ഇതില്‍ വലിയൊരു ഭാഗം ബിരുദധാരികളാണ്.

റാങ്ക് പട്ടികയില്‍ ഉള്‍പ്പെടുന്നവരിലും ജോലി നേടുന്നവരിലും ഉയര്‍ന്ന വിദ്യാഭ്യാസ യോഗ്യതക്കാരാണ് കൂടുതലും.
മറ്റ് ജോലികള്‍ ലഭിച്ചാല്‍ ഇവര്‍ ലാസ്റ്റ് ഗ്രേഡ് സര്‍വിസ് ഉപേക്ഷിക്കുന്നത് പതിവാണ്. ഈ പ്രവണത അവസാനിപ്പിക്കാനാണ് ബിരുദധാരികളെ തസ്തികയില്‍ നിന്നു മാറ്റിനിര്‍ത്താന്‍ സര്‍ക്കാര്‍ തീരുമാനിച്ചത്.

യോഗ്യതകള്‍ പരിഷ്‌കരിച്ച് 2011 ജൂലൈയിലാണ് സര്‍ക്കാര്‍ ഉത്തരവ് ഇറക്കിയത്. എന്നാല്‍ വിശേഷാല്‍ചട്ടം ഭേദഗതി ചെയത് ഉത്തരവ് പ്രാബല്യത്തിലാക്കാന്‍ അഞ്ചു വര്‍ഷം വേണ്ടിവന്നു. ലാസ്റ്റ്‌ഗ്രേഡ് ഉള്‍പ്പെടെ 49 വിഭാഗങ്ങളിലുള്‍പ്പെട്ട തസ്തികകളുടെ യോഗ്യതകളാണ് പരിഷ്‌കരിച്ച വിജ്ഞാപനത്തിലുള്ളത്.