തിരുവനന്തപുരം: രാജഭരണ കാലത്ത് പ്രവര്‍ത്തനം തുടങ്ങിയ സംസ്ഥാനത്തെ ഏക സിദ്ധ ആശുപത്രിയായ വള്ളക്കടവ് സര്‍ക്കാര്‍ സിദ്ധ ആശുപത്രിയുടെ പുതിയ കെട്ടിടത്തിന്റെ നിര്‍മാണ പുരോഗതി അടിയന്തിരമായി അറിയിക്കണമെന്ന് സംസ്ഥാന മനുഷ്യാവകാശ കമ്മീഷന്‍. കമ്മീഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക്കിന്റേതാണ് ഉത്തരവ്.
രണ്ടേമുക്കാല്‍ കോടി മുടക്കി നിര്‍മിക്കുന്ന കെട്ടിടത്തിന്റെ നിര്‍മാണ പ്രവര്‍ത്തനങ്ങള്‍ കാലാവധിയായ കഴിഞ്ഞ 27നകം പൂര്‍ത്തിയാക്കി വകുപ്പിന് കൈമാറുമെന്ന് പൊതുമരാമത്ത് വകുപ്പ് കെട്ടിടവിഭാഗം ചീഫ് എന്‍ജിനിയര്‍ മനുഷ്യാവകാശ കമ്മിഷനെ ഏപ്രില്‍ 4ന് അറിയിച്ചിരുന്നു. എന്നാല്‍ ജൂണ്‍ 27 കഴിഞ്ഞിട്ടും കെട്ടിടം നിര്‍മാണം പൂര്‍ത്തിയാക്കി ഭാരതീയ ചികിത്സാ വകുപ്പിന് കൈമാറിയില്ലെന്നാരോപിച്ച് മനുഷ്യാവകാശ പ്രവര്‍ത്തകനായ രാഗംറഹീം സമര്‍പ്പിച്ച പരാതിയിലാണ് നിര്‍മാണ പുരോഗതി റിപ്പോര്‍ട്ട് ഹാജരാക്കാന്‍ കമ്മിഷന്‍ ആവശ്യപ്പെട്ടത്.
വള്ളക്കടവ്, ബീമാപ്പള്ളി, പൂന്തുറ, ശംഖുമുഖം, വിഴിഞ്ഞം, പെരുമാതുറ പ്രദേശത്തെ മത്സ്യതൊഴിലാളികള്‍ ആശ്രയിക്കുന്ന ആശുപത്രിയാണ് ഇത്. ദിവസേന 500ല്‍പരം രോഗികളുടെ ആശ്രയകേന്ദ്രമാണ് ഇവിടം. 20 ബെഡ് ഉള്‍പ്പെടെ കിടത്തി ചികിത്സയും നിലവിലുണ്ട്. രോഗികള്‍ക്ക് സൗജന്യമരുന്നുകളാണ് നല്‍കി വരുന്നത്. കെട്ടിട നിര്‍മാണം ആരംഭിച്ചതോടെ ആശുപത്രിയുടെ പ്രവര്‍ത്തനം വാടക കെട്ടിടത്തിലേക്ക് മാറ്റി. വാടക കെട്ടിടം ഒഴിഞ്ഞുകൊടുക്കണമെന്ന് ഉടമ ആവശ്യപ്പെട്ടിട്ടുണ്ട്.
പുതിയ കെട്ടിടത്തിന്റെ നിര്‍മാണം അടിയന്തിരമായി പൂര്‍ത്തിയാക്കിയില്ലെങ്കില്‍ പാവപ്പെട്ടവരുടെ ആശുപത്രിയുടെ പ്രവര്‍ത്തനം നിലയ്ക്കും. പുതിയ കെട്ടിടം, നിര്‍മാണം പൂര്‍ത്തിയാക്കി 27നകം കൈമാറണമെന്ന് സര്‍ക്കാര്‍ പൊതുമരാമത്ത് വകുപ്പിന് നിര്‍ദ്ദേശം നല്‍കിയിരുന്നു. മൂന്നു ഘട്ടങ്ങളിലായി നിര്‍മിക്കുന്ന കെട്ടിടത്തിന്റെ രണ്ടു നിലകള്‍ പൂര്‍ത്തിയാക്കി കഴിഞ്ഞതായി പൊതുമരാമത്ത് വകുപ്പ് മനുഷ്യാവകാശ കമ്മിഷനെ രേഖാമൂലം അറിയിച്ചിരുന്നു.