ചാവക്കാട്: സമസ്ത സമുന്നത നേതാവും ദാറു റഹ്മ എഡ്യുക്കേഷണല്‍ കോംപ്ലക്‌സ് സ്ഥാപകനുമായ തൊഴിയൂര്‍ എം.കെ.എ കുഞ്ഞുമുഹമ്മദ് മുസ്‌ലിയാരുടെ മൂന്നാം ആണ്ടും ദാറു റഹ്മ ഹോസ്റ്റല്‍ കെട്ടിടത്തിന്റെ ഉദ്ഘാടനവും ജൂലൈ 15, 16 തിയ്യതികളില്‍ തൊഴിയൂര്‍ റഹ്മത്ത് നഗറില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു.
മഖാം സിയാറത്ത്, പൂര്‍വ വിദ്യാര്‍ഥി സംഗമം, മജ്‌ലിസുന്നൂര്‍ ആത്മീയ സംഗമം, മൗലിദ് പാരായണം, ഖത്മുല്‍ ഖുര്‍ആന്‍ ദുആ മജ് ലിസ്, ആദര്‍ശ സമ്മേളനം, അനുസ്മരണ സമ്മേളനം തുടങ്ങിയ സെഷനുകളിലായിട്ടാണ് പരിപാടികള്‍ സംഘടിപ്പിക്കുന്നത്.
നാളെ വൈകീട്ട് മൂന്നിന് ജലാലുദ്ദീന്‍ ബ്‌നു ഹിബത്തുല്ല തങ്ങളുടെ നേതൃത്വത്തില്‍ മഖാം സിയാറത്ത് നടക്കും. വൈകീട്ട് നാലിന് നടക്കുന്ന പൂര്‍വ വിദ്യാര്‍ഥി സംഗമം കോഴിക്കോട് ഖാസി സയ്യിദ് മുഹമ്മദ് കോയ ജമലുല്ലൈലി തങ്ങള്‍ ഉദ്ഘാടനം ചെയ്യും.
കെ.വി. അബ്ദുല്‍ ഖാദര്‍ എം.എല്‍.എ കോണ്‍ഫറന്‍സ് ഹാള്‍ ഉദ്ഘാടനം നിര്‍വഹിക്കും. ബശീര്‍ ഫൈസി ദേശമംഗലം മുഖ്യ പ്രഭാഷണം നടത്തും. പി.ടി. കുഞ്ഞുമുഹമ്മദ് മുസ്‌ലിയാരുടെ നേതൃത്വത്തില്‍ രാത്രി ഏഴിന് നടക്കുന്ന മജ് ലിസുന്നൂര്‍ സംഗമത്തില്‍ ഖലീല്‍ ഹുദവി കാസര്‍കോട് മുഖ്യ പ്രഭാഷണം നടത്തും.
ജൂലൈ 16 ന് രാവിലെ 8.30 ന് മൗലിദ് പാരായണം നടക്കും. പി.വി മുഹമ്മദ് കുട്ടി ബാഖവി ചേകനൂര്‍ നേതൃത്വം നല്‍കും.
രാവിലെ 9.30 ന് നടക്കുന്ന ഖത്മുല്‍ ഖുര്‍ആന്‍ ദുആ മജ് ലിസ് സമസ്ത ജനറല്‍ സെക്രട്ടറി പ്രൊഫ.കെ.ആലിക്കുട്ടി മുസ്‌ലിയാര്‍ ഉദ്ഘാടനം ചെയ്യും.
എം.എം.മുഹ്‌യിദ്ദീന്‍ മുസ്‌ലിയാര്‍ അധ്യക്ഷനാകും. ഇസ്മായില്‍ സഖാഫി തോട്ടുമുക്കം,അന്‍വര്‍ മുഹ്‌യിദ്ദീന്‍ ഹുദവി പ്രഭാഷണവും നിര്‍വഹിക്കും.
ഉച്ചക്ക് രണ്ടിന് നടക്കുന്ന ആദര്‍ശ സമ്മേളനം ഡോ. ബഹാഉദ്ദീന്‍ മുഹമ്മദ് നദ്‌വി കൂരിയാട് ഉദ്ഘാടനം ചെയ്യും. അബ്ദുല്‍ ഹമീദ് ഫൈസി അമ്പലക്കടവ് മുഖ്യപ്രഭാഷണം നടത്തും. വൈകീട്ട് നാലിന് നടക്കുന്ന അനുസ്മരണ സമ്മേളനവും ഹോസ്റ്റല്‍ കെട്ടിടോദ്ഘാടനവും പാണക്കാട് സയ്യിദ് സ്വാദിഖലി ശിഹാബ് തങ്ങള്‍ നിര്‍വഹിക്കും.
എസ്.എം.കെ തങ്ങള്‍ അധ്യക്ഷനാകും. സമസ്ത ട്രഷറര്‍ സി.കെ.എം. സ്വാദിഖ് മുസ്‌ലിയാര്‍ അനുസ്മരണ പ്രഭാഷണം നിര്‍വഹിക്കും. എം.ടി.അബ്ദുല്ല മുസ്‌ലിയാര്‍ മുഖ്യ പ്രഭാഷണം നടത്തും. ഇബ്രാഹിം കുഞ്ഞ് എം.എല്‍.എ അവാര്‍ഡ് ദാനം നടത്തും.
ചടങ്ങില്‍ ഇന്റര്‍നാഷനല്‍ ഇസ് ലാമിക് യൂനിവേഴ്‌സിറ്റീസ് ലീഗ് മെമ്പറായി തെരഞ്ഞെടുക്കപ്പെട്ട വാഫീ കോളജ് സ്ഥാപകന്‍ അബ്ദുല്‍ ഹകീം ഫൈസി ആദൃശ്ശേരിയെ അനുമോദിക്കും.
ഹംസ ബിന്‍ ജമാല്‍ റംലി പ്രഭാഷണം നടത്തും.തൊഴിയൂര്‍ ദാറു റഹ്മ സെക്രട്ടറി അബ്ദുല്‍ കരീം ഫൈസി, സ്വാഗത സംഘം ചെയര്‍മാന്‍ അബ്ദുല്‍ ഗഫൂര്‍ ഖാസിമി, ദാറുറഹ്മ മാനേജര്‍ സലീം പള്ളത്ത്, ജോയിന്റ് സെക്രട്ടറി കെ.വി മജീദ് ഹാജി വാര്‍ത്താസമ്മേളനത്തില്‍ സംബന്ധിച്ചു.