ജിദ്ദ: സഊദിയില്‍ തൊഴിലാളികള്‍ ഓടിപ്പോയതായി വ്യാജപരാതി നല്‍കിയ 2684 കേസുകള്‍ റദ്ദാക്കിയതായി ലേബര്‍ ഓഫിസ് മേധാവി അറിയിച്ചു.
ശമ്പള കുടിശിക നല്‍കാതിരിക്കാനും മറ്റുമാണ് പല സ്‌പോണ്‍സര്‍മാരും തൊഴിലാളികള്‍ ചാടിപ്പോയതായി ഇത്തരം പരാതി നല്‍കാറുള്ളത്. പരാതി വ്യാജമാണെന്ന് തെളിഞ്ഞാല്‍ തൊഴിലുടമക്കെതിരേ തൊഴില്‍മന്ത്രാലയം ശിക്ഷാനടപടി സ്വീകരിക്കാറുണ്ടെന്നും അദ്ദേഹം അറിയിച്ചു.
വിദേശതൊഴിലാളികള്‍ തൊഴിലിടങ്ങളില്‍നിന്ന് ഒളിച്ചേടിയാലാണ് 'ജോലി ഉപേക്ഷിച്ച് പോയ'വരുടെ (ഹുറൂബ്) പട്ടികയില്‍ തൊഴിലാളിയെ ഉള്‍പ്പെടുത്തുക.

എന്നാല്‍ ഈ അവസരം പല സ്‌പോണ്‍സര്‍മാരും ദുരുപയോഗം ചെയ്യുന്നതായി പില്‍കാലങ്ങളില്‍ ബോധ്യമായതിന്റെ അടിസ്ഥാനത്തില്‍ അത്തരം വ്യാജ ഹുറൂബുകള്‍ക്കെതിരേ പരാതി വര്‍ധിച്ചു. അത്തരം വ്യാജ ഹൂറൂബിനെതിരെ പരാതി നല്‍കാനും തൊഴിലാളികള്‍ക്ക് അവകാശം നല്‍കിയിട്ടുണ്ട്. ഈ അവകാശം പ്രയോജനപ്പെടുത്തി പരാതി നല്‍കിയ 2684 ഹുറൂബ് കേസുകളാണ് റിയാദില്‍ മന്ത്രാലയം റദ്ദാക്കിയതെന്ന് തൊഴില്‍ ഓഫിസ് മേധാവി അബ്ദുല്‍ കരീം അസീരി അറിയിച്ചു.

അതേ സമയം ഹൂറൂബ് റദ്ദാക്കിയ കേസില്‍ പഴയ സ്‌പോണ്‍സര്‍ക്ക് പകരം പുതിയ തൊഴിലുടമയെ കണ്ടെത്തി വിസാ മാറ്റത്തിന് തൊഴിലാളിക്ക് അര്‍ഹതയുണ്ടായിരിക്കും.

വ്യാജമായി തൊഴിലാളിയെ ഹുറൂബാക്കിയ തൊഴിലുടമയുടെ വര്‍ക്ക് പെര്‍മിറ്റ് ഒരു വര്‍ഷത്തേക്ക് തടയും. എന്നാല്‍ തൊഴില്‍, സാമൂഹിക വികസന മന്ത്രാലയത്തിന്റെ മറ്റ് സേവനങ്ങള്‍ തുടരും.
വീണ്ടും അന്യായമായി തൊഴിലാളികളെ ഹൂറൂബാക്കുന്ന തൊഴിലുടമക്കെതിരേ ഓരോ തവണയുമുള്ള പരാതിക്കനുസരിച്ച് സേവനങ്ങളും മൂന്നുവര്‍ഷത്തേക്കും അഞ്ച് വര്‍ഷത്തേക്കുമായി വിലക്കുമെന്നും അദ്ദേഹം അറിയിച്ചു.