കോടാലി: വീട് നിര്‍മാണത്തിന്റെ മറവില്‍ കുന്നിടിച്ചു മണ്ണ് എടുക്കുന്നത് നാട്ടുകാര്‍ തടഞ്ഞു. മുരിക്കിങ്ങല്‍ സെന്ററിന് സമീപം ഇന്നലെ രാവിലെയായിരുന്നു സംഭവം. പാലങ്കണ്ടത്തില്‍ ഉമ്മറിന്റെ സ്വകാര്യ വളപ്പില്‍നിന്നാണ് കൂട്ടിയിട്ടിരിക്കുന്നതോ ലഭിക്കുന്നതോ ആയ 830 ക്യുബിക്ക് മീറ്റര്‍ മണ്ണെടുക്കാനുള്ള ജിയോളജി വകുപ്പിന്റെ അനുമതിയോടെ മണ്ണെടുത്തിരുന്നത്. എന്നാല്‍ അനുമതിയുടെ മറവില്‍ കുന്നിടിച്ചു മണ്ണെടുക്കാന്‍ തുടങ്ങിയതോടെ സമീപത്തുള്ള കിണറുകളിലെ ജലവിതാനം കുത്തനെ താഴേക്ക് പോകുകയായിരുന്നു. സമീപത്തുണ്ടായിരുന്ന ഒരിക്കലും വറ്റാത്ത കിണറിലെ ജലവിതാനം കൂടി താഴ്ന്നതോടെയാണ് നാട്ടുകാര്‍ പ്രതിഷേധവുമായി രംഗത്തെത്തയത്. തുടര്‍ന്ന് വെള്ളിക്കുളങ്ങര പൊലിസും വില്ലേജ് ഓഫീസറും സ്ഥലത്തെത്തി മണ്ണെടുപ്പ് താല്‍കാലികമായി നിര്‍ത്തിവെപ്പിച്ചു. ജിയോളജി വകുപ്പുകാര്‍ വന്ന് വീണ്ടും മാര്‍ക്ക് ചെയ്തതിനു ശേഷം മാത്രം ഇനി മണ്ണെടുത്താല്‍ മതി എന്നാണു നിര്‍ദേശിച്ചിട്ടുള്ളത്.
അതെസമയം മണ്ണെടുക്കുന്ന വളപ്പിനു സമീപത്തുള്ള ഉസ്മാന്റെ സ്വകാര്യ വളപ്പില്‍ വീട് പണിതത്തിനു ശേഷം ഉള്ള കഷ്ടി 100 ക്യുബിക്ക് മീറ്റര്‍ മണ്ണ് മാറ്റാന്‍ അനുമതി കൊടുക്കാത്ത ജിയോളജി വകുപ്പ് ഉമ്മറിന്റെ വളപ്പില്‍നിന്ന് മണ്ണെടുക്കാന്‍ അനുമതി കൊടുത്തതില്‍ ദുരൂഹത ഉണ്ടെന്ന് നാട്ടുകാര്‍ ആരോപിക്കുന്നു.
മണ്ണ് മാറ്റാന്‍ സാധിക്കാത്തതിനാല്‍ ഉസ്മാന്‍ ഇപ്പോഴും തോട്ടത്തിലെ ഒറ്റ മുറി പാഡിയില്‍ ആണ് താമസം. കൂടാതെ സാധാരണ ഗതിയില്‍ 300 ക്യുബിക്ക് മീറ്റര്‍ മണ്ണ് വരെ എടുക്കാനാണ് അനുമതി നല്‍കാറെന്നും ഇവിടെ 830 ക്യുിക്ക് മീറ്റര്‍ മണ്ണ് മാറ്റാന്‍ എങ്ങിനെ അനുമതി നല്‍കി എന്നും നാട്ടുകാര്‍ ചോദിക്കുന്നുണ്ട്.