മലപ്പുറം: ഈമാസം 27ന് രാത്രി ആകാശത്ത് അപൂര്‍വ വിസ്മയ പ്രതിഭാസങ്ങളൊരുങ്ങും. ഈ നൂറ്റാണ്ടിലെ ഏറ്റവും ദൈര്‍ഘ്യമേറിയ ചന്ദ്രഗ്രഹണവും ഒരു രാത്രി മുഴുവന്‍ ആകാശത്ത് ചൊവ്വാ ഗ്രഹത്തിന്റെ ശോഭയേറിയ സാനിധ്യവുമായിരിക്കും ദൃശ്യമാകുക. സംസ്ഥാനത്ത് ജൂലൈ 27ന് രാത്രി 10.44ന് തുടങ്ങി 28ന് പുലര്‍ച്ചെ 4.58 വരെ ഈ പ്രതിഭാസം നീണ്ടു നില്‍ക്കും. 

ഗ്രഹണത്തിനിടെ ഓറഞ്ച് കലര്‍ന്ന ചുവപ്പു നിറത്തില്‍ ചന്ദ്രനെ ദൃശ്യമാവുന്ന രക്തചന്ദ്രന്‍ പ്രതിഭാസം 28ന് പുലര്‍ച്ചെ ഒന്നു മുതല്‍ തുടങ്ങി 2.43 വരെ ദൃശ്യമാകും. 27 ന് രാത്രി 10.44ന് ഉപഛായ ഗ്രഹണം തുടങ്ങുന്നതോടെയായിരിക്കും വിസ്മയ പ്രതിഭാസങ്ങളുടെ തുടക്കം. ഉപഛായ ഗ്രഹണ സമയത്ത് ചന്ദ്രന്‍ മങ്ങിയ നിലയിലാണ് ദൃശ്യമാവുക. തുടര്‍ന്ന് 11.54 മുതല്‍ ഭാഗിക ഗ്രഹണമാരംഭിക്കും. ചന്ദ്രന്റെ ഒരു ഭാഗം ഭൂമിയുടെ ഛായയിലും മറ്റു ഭാഗം ഉപഛായയിലും വരുന്ന പ്രതിഭാസമാണ് ഭാഗിക ചന്ദ്രഗ്രഹണം. ചന്ദ്രന്‍ മുഴുവനും ഭൂമിയുടെ ഛായയില്‍ വരുന്ന പൂര്‍ണഗ്രഹണം ഒരു മണിയോടെ തുടങ്ങും. പുലര്‍ച്ചെ 2.43 ഓടെ ചന്ദ്രന്റെ പൂര്‍ണ ഗ്രഹണത്തിനു പരിസമാപ്തിയാവും . 3.49ന് ഭാഗിക ഗ്രഹണവും 4.58 ന് ഉപഛായ ഗ്രഹണവും അവസാനിക്കും . 6 മണിക്കൂറും 16 മിനുട്ടും നീണ്ടു നില്‍ക്കുന്ന ചന്ദ്രഗ്രഹണം ഈ നൂറ്റാണ്ടിലെ ഏറ്റവും വലിയ ചന്ദ്രഗ്രഹണമാകുമെന്നാണ് ശാസ്ത്രലോകം വിശേഷിപ്പിക്കുന്നത്.
അതേദിവസം തന്നെ ചൊവ്വാ ഗ്രഹത്തെ കൂടുതല്‍ ശോഭയോടെ കാണാനാവുന്ന ഓപ്പോസിഷന്‍ പ്രതിഭാസവും ദൃശ്യമാകും. ചന്ദ്രഗ്രഹണ സമയത്ത് കൂടുതല്‍ തിളക്കമുളള ചൊവ്വയെ കാണാനാവുന്ന പ്രതിഭാസമാണിത്. പൂര്‍ണ ചന്ദ്രഗ്രഹണ സമയത്ത് ചൊവ്വയെ തലക്കു മുകളിലായാണ് ദൃശ്യമാവുക. ചന്ദ്രന്റെ 5.5 ഡിഗ്രി തെക്കായിട്ടായിരിക്കും ചൊവ്വ ശോഭ പരത്തി നിലകൊള്ളുക. 29.5 ഡിഗ്രി പടിഞ്ഞാറുഭാഗത്തായി ശനിയും കൗതുക കാഴ്ച്ചയാവും.
നക്ഷത്രങ്ങള്‍ക്കോ, ഗ്രഹങ്ങള്‍ക്കോ ചന്ദ്രന്‍ മറയിടുന്ന ഒക്കല്‍ട്ടേഷന്‍ പ്രതിഭാസവും ഈ വര്‍ഷം നടക്കാനിരിക്കുകയാണ്. സെപ്തംബര്‍ 18നായിരിക്കും ഇത്. ശുക്രന്‍, റെഗുലസ് നക്ഷത്രം, ചൊവ്വ, ബുധന്‍ എന്നിവയെ ചന്ദ്രന്‍ മറയിടുന്നതാണ് ഇത്തവണത്തെ ഒക്കല്‍ട്ടേഷന്‍ പ്രതിഭാസം.