മലപ്പുറം: ഓള്‍ കേരളാ മാപ്പിള സംഗീത അക്കാദമി സംസ്ഥാന കമ്മിറ്റി അവാര്‍ഡുകള്‍ പ്രഖ്യാപിച്ചു. നടിയും നര്‍ത്തകിയുമായ ശ്രീവിദ്യയുടെ പേരിലുളള അവാര്‍ഡ് പ്രസന്ന പ്രകാശ് കോഴിക്കോട്, മാപ്പിളപ്പാട്ട് കവി എ.വി മുഹമ്മദിന്റെ പേരിലുള്ള അവാര്‍ഡിന് മാപ്പിളപ്പാട്ട് നിരൂപകനായ അഷ്‌റഫ് കൊണ്ടോട്ടി എന്നിവര്‍ അര്‍ഹരായി. സുപ്രഭാതം മാനേജിങ് എഡിറ്റര്‍ നവാസ് പൂനൂര്‍, ആകാശവാണി ആര്‍ട്ടിസ്റ്റ് കെ.എം.കെ വെള്ളയില്‍, കലാമണ്ഡലം അരുണ ആര്‍.മാരാര്‍ എന്നിവരടങ്ങുന്ന ജൂറിയാണ് അവാര്‍ഡ് ജേതാക്കളെ തിരഞ്ഞെടുത്തത്. 10,001 രൂപയും ശില്‍പവും പ്രശസ്തി പത്രവുമടങ്ങുന്ന അവാര്‍ഡ് മെയ് 14 ന് കോട്ടക്കല്‍ മുനിസിപ്പല്‍ സി.എച്ച് ഓഡിറ്റോറിയത്തില്‍ നടത്തുന്ന പരിപാടിയില്‍ സമ്മാനിക്കും. വാര്‍ത്താസമ്മേളനത്തില്‍ കെ.എം.കെ വെള്ളയില്‍, ശ്രീജ ഒ.വി, ടി.എ സലിം, സിദ്ധിഖ് കോടമ്പുഴ, പി.കെ ശാക്കിര്‍, അനീസ സുബൈദ, എം.റയ്ഹാനത്ത് എന്നിവര്‍ പങ്കെടുത്തു.